ރާއްޖެ އަށް އެމެރިކާ އިން ކަނޑައަޅާފައި ހުންނަ ސަފީރު އަތުލް ކެޝަޕް މިއަދު ދެއްވާ ރޯދަ ވީއްލުމަށް ވަޑައިނުގަތުމަށް ރާއްޖޭގެ އެންމެ ސީނިއާ ނޫސްވެރިންގެ ތެރޭގައި ހިމެނޭ އިމާދު ލަތީފު ނިންމަވައިފި އެވެ.
ވީޓީވީގެ ޑިރެކްޓާ ޖެނެރަލްގެ މަޤާމުގައި ހުންނެވި އިމާދު މިގޮތަށް ނިންމަވާފައި ވަނީ، ފަލަސްތީނާ މެދު އެމެރިކާ އިން ގެންގުޅޭ ސިޔާސަތާ ދެކޮޅު ހެއްދެވުމުގެ ގޮތުންނެވެ.
އެމެރިކާގެ ސަފީރު އަތުލް ކެޝަޕް ފޮނުއްވި ދައުވަތާއި އެކު ފޭސްބުކްގައި ކުރެއްވި ޕޯސްޓުގައި އިމާދު ވަނީ ރޯދަ ވީއްލުމަށް ވަޑައިނުގަންނަވާނެ ކަމަށް ވިދާޅުވެފަ އެވެ.
"ފަލަސްތީނުގެ ރައްޔިތުންނާއެކު އަޅުގަނޑު ހުރިކަން ދެއްކުމަށް، މާދަމާ ހޮޓެލް ޖެންގައި އެމްބެސެޑަރު ކެޝަޕް ދެއްވާ ރޯދަވީއްލުން އަޅުގަނޑު ބޮއިކޮޓް ކުރަން،" އޭނާ ވިދާޅުވި އެވެ.
އިމާދު މިގޮތަށް ނިންމެވުމުން ގިނަ ބަޔަކު ގެންދަނީ އޭނާ އަށް ތަޢުރީފު ކުރަމުންނެވެ.
އިމާދަށް ތައުރީފުކޮށް ސޯޝަލް މީޑިޔާގައި ޚިޔާލުފާޅު ކުރި ބައެއް މީހުން ބުނެފައިވާ ގޮތުގައި، އެއީ "ވަރަށް ކެރޭ ވަރުގަދަ ނިންމުމެއް" ގޮތުގައި ސިފަކޮށްފައިވެ އެވެ.
މައުލޫމާތު ލިބިފައިވާ ގޮތުގައި އިމާދުގެ އިތުރުން، ދެން އެމެރިކާ ސަފީރުގެ ދައުވަތު ލިބުނު އެހެން ނޫސްވެރިޔަކު ރޯދަ ވީއްލުމަށް ނުދާން ނިންމައިފައެއް ނުވެ އެވެ.