ޑާކް ރެއިން އެންޓަޓައިންމަންޓްގެ ދެ ފިލްމެއް އަނެއްކާ ވެސް އައިސް ޓީވީން ޕްރިމިއާ ކުރާ ގޮތަށް ނިންމައިފި އެވެ.
މި ފަހަރު އެ ޗެނެލުން ގެނެސް ދޭން ހަމަޖެހިފައިވާ ދެ ފިލްމަކީ މިދިޔަ އަހަރު ރިލީޒް ކުރި "މީ ލޯތްބަކީ" އާއި 2014 ގައި ރިލީޒް ކުރި "ހުޅުދާން" އެވެ.
މިދިޔަ އަހަރު ބޭއްވި 8 ވަނަ ދިވެހި ފިލްމް އެވޯޑްސްގައި އެންމެ މޮޅު ސްކްރީންޕްލޭއާ އެކު، ޖުމްލަ 5 އެވޯޑް ގެންދިޔަ "ހުޅުދާން" އަކީ 2015 ގައި ސާކް ފިލްމް ފެސްޓިވަލްގައި ވެސް ވާދަ ކުރި ފިލްމެކެވެ.
މިއީ އައިޝަތު ފުއާދު ތައުފީގު ލިޔެ، ޑައިރެކްޓްކޮށްފައިވާ ފިލްމެކެވެ.
ވަޒީފާ އިން މުސްކުޅި ކުރާ ފިރިހެނެއްގެ ވާހަކަ ކިޔައިދޭ "ހުޅުދާން" ގެ ކާސްޓުންގެ ތެރޭގައި ހަސަން މަނިކު (ރޯނު)، މަރިޔަމް މަޖުދާ (މަޖޫ) އަދީ ރަވީ ފާރޫގް ފަދަ ތަރިން ހިމެނެ އެވެ.
މި ފިލްމް އައިސް ޓީވީން ދައްކާނީ މި މަހުގެ 9 ވަނަ ދުވަހުގެ ރޭ 10:00 ގަ އެވެ.
"މީ ލޯތްބަކީ" ދައްކަން ހަމަޖެހިފައި ވަނީ ފިތުރު އީދު ދުވަހުގެ ރޭ 10:00 ގަ އެވެ.
މިއީ އަލީ ޝިފާއު (ޗިއްޕެ) ޑައިރެކްޓްކޮށްފައިވާ ރޮމޭންޓިކް ކޮމެޑީއެކެވެ. ފިލްމްގެ ލީޑް ރޯލް ކުޅެފައި ވަނީ ޖުމައްޔިލް ނިމާލާއި މަރިޔަމް އައްޒަ އެވެ.
އައިސް ޓީވީން ކުރިން ވަނީ ޑާކް ރެއިންގެ "ވާށޭ މަށާއެކީ" އާއި "އެންމެ ފަހު ވިންދާ ޖެހެންދެން" ވެސް ދައްކައިފަ އެވެ.