އައްޑޫސިޓީގައި ދެ ގްރޫޕެއްގެ މެދުގައި އުފެދުނު ހަމަނުޖެހުމެއްގެ ތެރެއިން ހިނގައިދިޔަ މާރާމާރީއާއި ގުޅިގެން އެކަމުގެ ކަންބޮޑުވުންތައް ކައުންސިލުން އައްޑޫ ސިޓީގައި މަސައްކަތް ކުރާ ފުލުހުންނާއި ހިއްސާކޮށްފިއެވެ.
ކައުންސިލްގެ އޮފިޝަލަކު ވިދާޅުވި ގޮތުގައި ކައުންސިލުން ފުލުހުންނާއި ބައްދަލުކުރީ ރޭގެ މާރާމާރީއާއި ގުޅިގެން އާއްމު ރައްޔިތުންގެ ހިތްތަކުގައި އުފެދިފައިވާ ނުތަވަސްކަމަށް ހައްލު ހޯދުމުގެ ގޮތުން ކަމަށެވެ.
"ކައުންސިލުން ވާނީ މިފަހަކަށް އައިސް އައްޑޫގައި ހިނގާ މާރާމާރީތައް ހުއްޓުވައި އެކަމުގައި ޝާމިލުވާ ފަރާތްތަކަށް ފިޔަވަޅު އެޅުމަށް ކުރަންޖެހޭ މަސައްކަތްތައް އަވަސްކޮށްދިނުމަށް އެދިފައި." އޮފިޝަލް ވިދާޅުވިއެވެ.
އޮފިޝަލް ވިދާޅުވި ގޮތުގައި ފުލުހުން ވަނީ ރޭގެ މާރާމާރީއާއި ގުޅިގެން އުފެދުނު ހަމަނުޖެހުންތައް ހައްލުކޮށް ސުލްހަ މަސަލަސްކަން ޤާއިމުކުރުމުގެ މަސައްކަތް ކުރާ ކަމުގެ ޔަގީންކަން ފުލުހުން ދިން ކަމަށެވެ.
އައްޑޫގައި މިފަހަކަށް އައިސް ގްރޫޕް މާރާމާރީތައް އިތުރުވެފައިވާއިރު ރޭގެ މާރާމާރީއާއި ގުޅިގެން ފުލުހުން ވަނީ ހަތަރު މީހަކު ހައްޔަރުކޮށްފައެވެ.
ރޭ މަރަދޫ ވެންބޮޅޮފިށި ސްޓޭޑިއަމްގައި ހިތަދޫ ގްރޫޕަކާއި ފޭދޫ ގްރޫޕަކުން ހިންގި މާރާމާރީ އަށް ފަހު، ސްޓޭޑިއަމް ކުރިމަތީގައި ހުންނަ ކެފޭއަކަށް ވަދެ، އެތަނުގައި ވެސް މާރާމާރީ ހިންގައި، ތަނަށް ވެސް ގެއްލުން ދީފައިވެއެވެ.
އަދި އޭގެ ފަހުން ހިތަދޫގައި ވެސް ދެ ގްރޫޕެއްގެ މެދުގައި ހަމަނުޖެހުންތަކެއް ވަނީ ހިންގާފައެވެ.