މި އަހަރު ބާއްވާ ރިޔާސީ އިންތިހާބް އެއް ބުރުން ކާމިޔާބްކޮށް، ކުރިއަށް އޮތް ފަސް އަހަރު ތެރޭ އައްޑޫ ތަރައްގީކޮށް ފުރިހަމަ ސިޓީއަކަށް ހައްދަވާނެ ކަމަށް އެމްޑީޕީގެ ރިޔާސީ ކެންޑިޑޭޓް އަދި ކުރގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރޭ އައްޑޫގައި ބޭއްްވި "އެއްބުރުން" ޖަލްސާގައި ނަޝީދު ވިދާޅުވީ ކުރިއަށް އޮތް ފަސް އަހަރު ތެރޭ އައްޑޫގެ އުފެއްދުންތެރިކަން އިތުރުކޮށް ވަޒީފާ ނެތް މީހަކު އައްޑޫގައި ނުހުންނާނެ ވަރަށް އައްޑޫ ތަރައްގީ ކުރައްވާނެ ކަމަށެވެ. އަދި އެމްޑީޕީގެ ގެސްޓް ހައުސް ސިޔާސަތުގެ ދަށުން އައްޑޫގައި ޓޫރިޒަމްގެ 3،000 އެނދު ހައްދަވާނެ ކަމަށެވެ.
ރޭގެ ޖަލްސާގައި އިތުރަށް ވާހަކަ ދައްކަވަމުން ނަޝީދު ވިދާޅުވީ މިހާރު ވެރިކަމަށް އަންނަން ފައި ނަގާފައި ތިބި "ބާޢީން" ކިތަންމެ ބޮޑުވެގެންވާ އިއްތިހާދެއް ހަދައިގެން ނިކުތަސް ބަލި ކުރާނެ ކަމަށެވެ. އަދި އިއްތިހާދު ހަދައިގެން ޖަހަން އުޅޭ ސަކަރާތަކީ ސަރުކާރުގެ މަގަމާމުތައް ބަހައި، ރާއްޖޭގެ ވަސީލަތްތައް ބައި އެޅުން ކަމަށް ވިދާޅުވި އެވެ.
އެކަމަކު އެއީ ރައްޔިތުން ބޭނުންވާ ގޮތް ނޫން ކަމަަށާއި ރައްޔިތުން ބޭނުން ވަނީ ތަރައްގީ ކަމަށް ނަޝީދު ވިދާޅުވި އެވެ. އެެ މަނިކުފާން އަދި ވިދާޅުވީ ރާއްޖޭގައި މިހާރު އޮތީ އިސްލާމް ދީނުގައި މަނާ ކުރައްވާފައިވާ "ބަޢާވާތް" ކުރުން ފަދަ ބޮޑު ޖަރީމާއެއް ހިންގައި ރާއްޖޭގެ އިންތިހާބީ ރައީސް މަރާލަން މަސައްކަތްކޮށް "ބަޢާވާތްކޮށްގެން ގެނައި ހަރާން ވެރިކަމެއް" ކަމަށެވެ.