އދ.ގެ ސަލާމަތީ މަޖިލީހުގެ ގޮނޑި ރާއްޖެ އަށް ކާމިޔާބު ނުކުރެވޭނެ ކަމަށް ގަލޮޅު ދެކުނު ދާއިރާގެ މަޖިލިސް މެންބަރު އަހްމަދު މަހްލޫފް ވިދާޅުވެއްޖެއެވެ.
މަހްލޫފް މިގޮތަށް ވިދާޅުވީ، ފިޝަރީޒް މިނިސްޓަރު ޑރ. މުހައްމަދު ޝައިނީ އަށް ރައްދު ދެއްވައި ކުރެއްވި ޓްވީޓެއްގައެވެ.
ޝައިނީ ވިދާޅުވެފައި ވަނީ ގިނަ ގައުމުތަކުގެ ތާއީދާ އެކު އދ.ގެ ސަލާމަތީ މަޖިލީހުގެ ގޮނޑި ރާއްޖެ އަށް ކާމިޔާބު ކުރެވޭނެ ކަމުގެ ޔަގީން ކަން އޮތް ކަމަށެވެ.
ޝައިނީގެ މި ވާހަކަތަކަށް ރައްދު ދެއްވައި މަހްލޫފް ވިދާޅުވީ، އަވަށްޓެރި އިންޑިޔާއިން ވެސް ރާއްޖެއަށް ވޯޓެއް ނުދޭނެ ކަމަށެވެ.
އަދި އެމްޑީޕީ ސަރުކާރުގެ ފޮރިން މިނިސްޓަރ ކަން ކުރެއްވި ކެރަފާ ނަސީމްގެ މަސައްކަތާއި ބެހޭގޮތުން މަހްލޫފް ވިދާޅުވީ، އެއީ "ޔާމީންގެ ސަރުކާރުގެ އަނިޔާވެރިކަން ދުނިޔެއަށް ހާމަކޮށް ދެއްވުން" ކަމަށެވެ. އެހެން ނަމަވެސް ސަރުކާރުން ތުހުމަތު ކުރަނީ އެއީ ރާއްޖޭގެ އަގު ވައްޓާލުމަށް ކުރެއްވި މަސައްކަތެއްގެ ގޮތުގައެވެ.
މަހްލޫފް އިތުރަށް ވިދާޅުވެފައިވާ ގޮތުގައި ސިފައިން ލައްވައި ރައްޔިތުންގެ މަޖިލީހާއި ސުޕްރީމް ކޯޓުހައިޖެކްކޮށް ސިޔާސީ ވާދަވެރިން ޖަލަށް ލުމުގެ ނަތީޖާ އަކީ ފެއިލްވުން ކަމަށެވެ.
އދ.ގެ ސަލާމަތީ މަޖިލީހުގެ ގޮނޑީގެ އިންތިޚާބު މިއަދު އޮންނާނެއެވެ. އެ އިންތިޚާބަށް ރާއްޖެ އިން ވަނީ ވަރަށް ވަރުގަދަ ކެމްޕޭނެއް ކޮށްފަ އެވެ.