މޯލްޑިވިއަން އައިޑޮލް ސީޒަން އެކެއްގައި ވާދަ ކުރި މަރަދޫ އަބްދުﷲ ޒިޔާއު (ޒިޔާ) އަންނަ މަހު ކަޒަކަސްތާނުގައި ބާއްވާ އޭޝިއާ ޕެސިފިކް ބްރޯޑްކާސްޓިން ޔުނިއަން (އޭބީޔޫ) ގެ މި އަހަރުގެ ރޭޑިއޯ ސޯންގް ފެސްޓިވަލްގައި ވާދަ ކުރާ ގޮތަށް ހަމަޖެހިއްޖެ އެވެ.
އޭނާ އަށް ފެސްޓިވަލުން ފުރުސަތު ލިބުނީ އޭގައި ބައިވެރިވާން އާންމުކޮށް ހުޅުވައިލުމުން، އަމިއްލަ އަށް ތައްޔާރުކޮށް ހުށަހެޅި ލަވަ "ކުރިއަށް ދާނީ ގަދަ ހިތްވަރުން" ފެސްޓިވަލަށް ހޮވިގެންނެވެ.
ރާއްޖޭގެ އިތުރުން އެހެން 8 ގައުމަކުން ވެސް ވާދަ ކުރާ ފެސްޓިވަލް އޮންނާނީ އަންނަ މަހުގެ 11 ގައި ކަޒަކަސްތާންގެ އާސްޓާނާގަ އެވެ. ފެސްޓިވަލްގައި ބައިވެރިވާ އެހެން ގައުމުތަކުގެ ތެރޭގައި އިންޑިއާ، މަކާއޯ، ނޭލާޕް، އަފްގާނިސްތާން، ވިއެޓްނާމް، ތުރުކީ، ތުރްކެމެނިސްތާން އަދި މުބާރާތް ބާއްވާ ކަޒަކަސްތާން ހިމެނެ އެވެ.
ޒިޔާ ބުނީ 2016 ގައި ވެސް މުބާރާތުގައި ވާދަ ކުރަން އޭނާ ލަވައެއް ހުށަހެޅި ކަމަށެވެ. އެކަމަކު އެ ފަހަރު އޭނާ ހުށަހެޅި ލަވަ އަށް ފެސްޓިވަލުން ޖާގައެއް ލިބޭ ގޮތެއް ނުވި އެވެ.
އޭނާ ކަޒަކަސްތާންގެ ފެސްޓިވަލަށް ދާނީ ޕަބްލިކްސް ސާވިސް މީޑިއާ (ޕީއެސްއެމް) އާ އެކުގަ އެވެ.