ކުރީގެ ރައީސް މުހައްމަދު ނަޝީދުގެ ވެރިކަން "ބަޢާވާތްކޮށްގެން" ވައްޓާލުމަށް ފަހު، ނަޝީދު އޭނާ އާ ދިމާއަށް "ބާޢީ" އޭ ވިދާޅުވި ކަމަށް ބުނެ ލަދު ހަޔާތް ކުޑަކަމުން ނަޝީދުގެ މައްޗަށް ކޮމިޝަނަރު އޮފް ޕޮލިސް (ސީޕީ) އަބްދުﷲ ރިޔާޒް ދައުވާ ކުރައްވާ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
ރޭ އެމްޑީޕީން ހިތަދޫގައި ބޭއްވި "އެއްބުރުން" ޖަލްސާގައި ވާހަކަ ދައްކަމުން އަސްލަމް ވިދާޅުވީ ރިޔާޒަކީ އޭނާ އާ ވެސް އެކުވެރި ބޭފުޅެއް ކަމަށެވެ. އެކަމަކު އެއީ "ބާޢީ" އެއް ކަމަށް އަސްލަމް ވިދާޅުވި އެވެ. އަސްލަމް ވިދާޅުވީ އޭނާގެ މައްޗަށް ދައުވާ ކުރިޔަސް މައްސަލެއް ނެތް ކަމަށާއި ސީޕީއަކީ ހަމަ "ބާޢީއެއް" ކަމަށެވެ.
ރޭގެ ޖަލްސާގައި އަސްލަމް ވަނީ ރިޔާސީ އިންތިހާބަށް ކުރިމަތިލައްވާ ބައެއް އެހެން ކެންޑިޑޭޓުންނަށް ވެސް ފާޑު ވިދާޅުވެފަ އެވެ. އެގޮތުން ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމްގެ ސިޔާސަތަކީ "މަށް މިޅިން" ސިޔާސަތު ކަމަށް އޭނާ ވިދާޅުވި އެވެ.
އަދި ޕީޕީއެމްގެ ކެންޑިޑޭޓް އަބްދުﷲ ޔާމީނަށް ފާޑު ވިދާޅުވަމުން އަސްލަމް ވިދާޅުވީ ތެޔޮ ހޯދާނެ ވާހަކަ ވިދާޅުވާ އިރު، ނަގަން އުޅެނީ މިޔަރު ތެޔޮ ކަމެއް ނުވަތަ ކާށި ތެޔޮ ކަމެއް ވެސް ސާފު ނުވާ ކަމަށެވެ.