ގޯދިއްޔާގެ ޗެމްޕިއަންކަން ބޭރުމަތިން ތަކުރާރުކޮށްފި

މިޓްސިބުޝީ ގޯދިއްޔާ ފުޓްސަލް ކަޕް 2018ގެ ޗެމްޕިއަންކަން ސ.ހިތަދޫ އެފްސީ ބޭރުމަތިން ހޯދައިފިއެވެ.

އެފްސީ ބޭރުމަތިން ޗެމްޕިއަންކަން ހޯދީ ފައިނަލުގައި ފޭދޫ ލޮނަ އެފްސީ އާއި ވާދަކޮށް ޕެނަލްޓީ ޖަހައިގެން 4-5 އިން މޮޅުވެގެންނެވެ.

ގޯދިއްޔާ ފުޓްސަލް މުބާރާތުގެ މިދިޔަ އަހަރުގެ ޗެމްޕިއަނަކީ ވެސް އެފްސީ ބޭރުމަތިއެވެ. 2017ގެ ގޯދިއްޔާ މުބާރާތް ކާމިޔާބު ކުރި ފަހުން އެފްސީ ބޭރުމަތި ޓީމު ގޯދިއްޔާ މުބާރާތުގެ މެޗަކުން ބަލިވެފައި ނުވެއެވެ.

މެޗްގެ ފުރަތަމަ ލަނޑު ޖަހައި ލީޑް ނެގީވެސް ބޭރުމަތިންނެވެ. ފުރަތަމަ ހާފްގައި ޓީމަށް ލީޑު ނަގާދިނީ މުބާރާތުގެ މޮޅު ކުޅުންތެރިޔާ ހޯދައި އެންމެ މޮޅު 5 ކުޅުންތެރިންގެ ތެރޭގައި ހިމެނުނު އަލީ ހާފިޒުއެވެ.

ލޮނަ އެފްސީން މެޗް ހަމަހަމަ ކުރީ ދެވަނަ ހާފްގައި މެޗްގެ މޮޅު ކުޅުންތެރިޔާ ހޯދި މުހައްމަދު ލިއާއުއެވެ.

ފައިނަލް މެޗަށް ފަހު މުބާރާތުގެ ސްޕޮންސަރުންނާއި، ރެފްރީކަންކޮށްދެއްވި އޮފިޝަލުންގެ އިތުރުން އެކި ގޮތްގޮތުން އެހީތެރިވި ފަރާތްތަކަށް ވަނީ ސެތްފިކެޓާއި ޝީލްޑް ހަވާލުކޮށްފައެވެ.

މުބާރާތުގެ ވަނަތައް:

* މުބާރާތުގެ ޓޮޕް ސްކޯރާ: ހުސެން ޝަރީފް (އޮންލީ) ކްލަބް ވީއެޗް

* މުބާރާތުގެ އެންމެ މޮޅު ކުޅުންތެރިޔާ: އަލީ ހާފިޒު (އެފްސީ ބޭރުމަތި)

* އެންމެ މޮޅު ފަސް ކުޅުންތެރިން:

1- އިބްރާހިމް ސިނާހު (އެފްސީ ބޭރުމަތި)
2- ހަސަން ޝަރީފް (އޮންލީ) (ކްލަބް ވީއެޗް)
3- އަލީ ހާފިޒު (އެފްސީ ބޭރުމަތި)
4- އަބްދުﷲ ޝާފިއު (ލޮނަ އެފްސީ)
5- މުހައްމަދު ލިޔާއު (ލޮނަ އެފްސީ)

* އެންމެ މޮޅު ކީޕަރ: މުހައްމަދު ޝަފީއު (އެފްސީ ބޭރުމަތި)

* ފެއާ ޕްލޭ ކުޅުންތެރިޔާ: ހަސަން އަތޫފް (ޒެލޯން)

* އުއްމީދީ ކުޅުންތެރިޔާ: ހޫދު އައްބާސް (ޑީސީ ޖޫނިޔާސް)

* ފެއާ ޕްލޭ ޓީމް: ކްލަބް ވީއެޗް

މިރޭގެ ފައިނަލް މެޗަށ ފަހު ގޯދިއްޔާއިން ވަނީ ޗެމްޕިއަން ޓީމާއި ރަނައަޕް ޓީމަށް ދޭން ޖެހޭ ފައިސާގެ އިނާމު ވަގުތުން ހަވާލުކޮށްފައެވެ. އެގޮތުން ރަނައަޕް ޓީމަށް 30،000 ރުފިޔާ ދީފައިވާއިރު ޗެމްޕިއަން ޓީމަށް ދޭން ޖެހޭ 80،000 ރުފިޔާގެ ތެރެއިން 70،000 ރުފިޔާ ވަނީ ޓީމާއި ހަވާލުކޮށްފައެވެ.

ގޯދިއްޔާއިން ބުނީ ބާކީ 10،000 ރުފިޔާ ޗެމްޕިއަން ޓްރޮފީ ގޯދިއްޔާ އާއި ހަވާލު ކުރުމުން ޓީމަށް ރައްދުކޮށްދޭނެކަމަށެވެ.

ރާއްޖޭގައި ބާއްވާ އެންމެ ފޯރިގަދަ ފުޓްސަލް މުބާރާތް ކަމަށްވާ ގޯދިއްޔާގެ މިއަހަރުގެ މުބާރާތަކީ މެދު ނުކެޑި އެޖަމިއްޔާއިން ބޭއްވި 10 ވަނަ މުބާރާތެވެ.

ގޯދިއްޔާއިން މިރޭ ވަނީ މިއަށްވުރެ ފޯރިގަދަ މުބާރާތެއް އަންނަ އަހަރު ބާއްވާނެކަން އިއްލާންކޮށްފައެވެ.

މިއަހަރުގެ މުބަރާތުގެ މެއިން ސްޕޮންސާ އަކީ މިޓިސުބުޝީ މެރިން އިންޖީންއެވެ، ކޯ ސްޕޮންސާރ އަކީ ހެޕީ މާކެޓްއެވެ. ޓްރެވަލް ޕާޓްނާ އަކީ ސްރީލަންކަންއެވެ. ކޭޓަރިން ޕާޓްނާއަކީ ޕާމް ވިލެޖް ރެސްޓޯރެންޓެވެ. ޝޮޕިން ޕާޓްނާއަކީ ހިތަދޫ މަލްޓި މާޓްއެވެ. ސްޕޯޓްސް ޕާޓްނާއަކީ ފަލަކް ސްޕޯޓްސްއެވެ. މި މުބާރާތުގެ މީޑިއްާ ޕާޓްނާއަކީ "އައްޑޫލައިވް"އެވެ.