ރާއްޖޭގެ ކޯޓްތަކުން ކުރާ ހުކުމްތަކުގައި ބޮޑެތި މައްސަލަތައް އެބަހުރި ކަމަށާއި އެ ހުކުމް ތަކާއި ދޭތެރޭ ހިތްހަމަޖެހިވަޑައި ނުގަންނަވާ ކަމަށް ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
"އައްޑޫ ލައިވް" އަށް ދެއްވި ހާއްސަ އިންޓަވިއުއެއްގައި އެ މަނިކުފާނު ވިދާޅުވީ ކޯޓްތައް އިސްލާހުކޮށް، ހަމަ އާއި އިންސާފުގެ މަގަަށް ރުޖޫއަ ކުރަން ޖެހޭ ކަމަށް ޤަބޫލުކުރައްވާ ކަމަށެވެ.
ޑރ. ޖަމީލު ވިދާޅުވި ގޮތުގައި ރާއްޖޭގެ ކޯޓުތަކާއި ބެހޭ ޤާނޫނަށް އިސްލާޙުތަކެއް ގެނައީ ރައްޔިތުންގެ މަޖިލީހަށް ދިމާވެފައިވާ މައްސަލަ ތަކާއި ރާއްޖޭގައި އޮތް ސިޔާސީ ހަލަބޮލިކަން ހައްލުކުރުމަށް ކަމަށެވެ.
އެ އިސްލާޙުތައް ގެނައި ނަމަވެސް ކޯޓުތަކުން ކުރާ ޙުކުމްތަކާއި މެދު ވެސް ހިތްހަމަނުޖެހުންތައް އެބަހުރި ކަމަށެވެ. އެގޮތުން ޑރ. ޖަމީލް ފާހަގަކުރެއްވީ 1 ފެބްރުއަރީގައި ސުޕްރީމް ކޯޓުން ނެރުނު އަމުރެވެ.
އެ އަމުރާއި ބެހޭގޮތުން ޑރ. ޖަމީލް ވިދާޅުވީ، އެއް ހުކުމެއްގައި ޖިނާޢީ ބޮޑެތި ހުކުމްތަކެއް ހިމެނޭ ގޮތަށް "ބައިވަރު ކަންތަކެއް ހުރުން ޤަބޫލު ނުކުރެއްވޭ" ކަމަށާއި ކޮންމެ ކަމަކަށް ނެރެން ޖެހޭނީ ވަކި އަމުރެއް ކަމަށެވެ.
ޑރ.ޖަމީލް ޖިނާޢީ ބޮޑެތި ހުކުމްތަކުގެ ގޮތުގައި އިޝާރާތް ކުރެއްވީ ކުރީގެ ނައިބު ރައީސް އަހްމަދު އަދީބުގެ މައްސަލަތަކެވެ. އެހެން ނަމަވެސް ޑރ. ޖަމީލް ވިދާޅުވީ، އެކަން އެގޮތަށް ފާހަގަކުރެއްވި އަދީބު އާއި ޒާތީ މައްސަލައެއް އޮވެގެނެއް ވެސް ނޫން ކަމަށެވެ.
ޑރ.ޖަމީލު ވިދާޅުވި ގޮތުގައި ކޯޓުތަކުން ކުރާ ހުކުމްތަކުގައި މައްސަލަ ހުރި ނަމަވެސް އެއަށް ތަބާވުން ނޫން ގޮތެއް ސަރުކާރަށް ނޯންނާނެ އެވެ. އަދި އެ ހުކުމާއި މެދު ހިތްހަމަ ނުޖެހޭ ނަމަ ސަރުކާރުން އެ މައްސަލައެއްގެ ހައްލު ހޯދާނީ ކޯޓު ނުވަތަ މަޖިިލިސް މެދުވެރިކޮށް ކަމަށެވެ.
ރައީސް އަބްުދުﷲ ޔާމީންގެ ސަރުކާރުގެ ފުރަތަމަ ނައިބު ރައީސް ޑރ. ޖަމީލް ވިދާޅުވި ގޮތުގައި ކޯޓުތަކާ ބެހޭ ގާނޫނަށް ގެނެސްފައިވާ އެކު ދަށު ކޯޓުތަކުގައި ކުޅޭ ކުޅިގަނޑާއި ހައި ކޯޓުން ކުޅޭ ކުޅިގަނޑާ ސުޕްރީމް ކޯޓުން ކަންތައް ކުރާ ގޮތާ ދޭތެރޭ ވެސް ސުވާލު ކުރެވޭނެ އެވެ.
ކޯޓުތަކަށް ފަނޑިޔާރުން އައްޔަން ކުރާ ގޮތަށް އިޝާރާތް ކުރައްވައި ޑރ. ޖަމީލު ވިދާޅުވީ "ހުރިހާ ކަމެއް ހިނގަމުން ދަނީ ގައުމެއްގެ ސިފަ އޮންނަ ތަނެއްގައި ހިނގާ ގޮތަކަށް ނޫން،" ކަމަށެވެ.
ޑރ. ޖަމީލް ވިދާޅުވި ގޮތުގައި ގާނޫނެއް ނެތް ވެއްޓެއްގައި ކަންތައް ހިނގާ ބީދައިން ރާއްޖޭގައި ކަންތައް ހިނގުމަކީ ބައެއް މީހުންނަށް ޖޯކަކަށް ވިޔަސް އެއީ އެބޭފުޅާގެ ނަޒަރުގައި ވަރަށް ސީރިއަސް މައްސަލައެއް ކަމަށެވެ.
"އަޅުގަނޑު ދެކެނީ ގާނޫނު ނުހިނގާ ތަނެއްގައި ކަންތައްތައް ހިނގާ ބީދައިން. މިހާރު ކަންތައް ހިނގަމުން މިދަނީ. ގާނޫނެއް ހިނގާ ނަމަ ވަކި ބަޔަކަށް އަމާޒުކޮށްގެން ގޮސްފައި ގާނޫނުތަކެއް ހަދާ ފޮރުވިފައިވާ ހެއްކާއި ދިފާއި ހެކި ނުދީ، އިސްތިއުނާފަށް އޮންނަ މުއްދަތާއި މިހުރިހާ (އެއްޗެއް ނުދީ) ގާނޫނު އަސާސީގައި ޚިލާފަށް ކަންތައް ނުކުރެވޭނެ" ޑރ. ޖަމީލު ވިދާޅުވި އެވެ.
މީގެ އިތުރުން ޖަމީލު ވިދާޅުވި ގޮތުގައި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ މައްޗަށް މިހާރު ކުރާ ދައުވާތައް ކުރެވޭނެ ކަމަށް ޤަބޫލު ނުކުރާ ކަމަށެވެ. އޭގެ ސަބަބެއް ކަމަށް ޑރ. ޖަމީލު ފާހަގަކުރެއްވީ ސުޕްރީމް ކޯޓުގެ ބެންޗްގެ އަޤުލަބިއްޔަތުން ނެރޭ އަމުރަކުން މެނުވީ އެ ކޯޓުގެ ފަނޑިޔާރުން ހައްޔަރު ނުކުރެވޭނެ ކަމަށް ޤާނޫނުގައި އޮތުމެވެ.
"(ސުޕްރީމްކޯޓުގެ) ބެންޗްގެ އަޤުލަބިއްޔަތުން އަމުރެއް ނެރެގެންނޭ ވާނީ(ހައްޔަރުކުރެވޭނީ).އެއާ ޚިލާފަށް ކަންތައް ކުރާ ވަކީލުންނާ އަދި ދައުވާ ކުރާ ފަރާތްތަކާއި ފަނޑިޔާރުންގެ މައްޗަށް އަޅުގަނޑު ދެކޭ ގޮތުގައި މާދަމާ ސައްހަ ގޮތުގައި ދައުވާ ކުރެވޭނެ،" އެމީހުންގެ މައްޗަށް މި ކަމުގައި ބައިވެރިވީތީ އަދަބު އަންނަން ޖެހޭނެ ކަމަށް ޤަބުލު ކުރަން."