ޖުމްހޫރީ ޕާޓީގެ ލީޑަރުގެ ގޮތުގައި ހުންނަވާ ބޭފުޅަކަށް ރިޔާސީ ޓިކެޓް ލިބޭގޮތަށް އޮންނަ އޮތުން ބަދަލުކޮށް ޕްރައިމަރީ އަކުން ރިޔާސީ ކެންޑިޑޭޓް ދޭން އަސާސީ ޤަވާއިދު އިސްލާހުކުރަން އެޕާޓީން ނިންމައިފިއެވެ.
ޖުމްހޫރީ ޕާޓީން މައުލޫމާތު ދޭ ގޮތުގައި މިމަހު ބޭއްވުމަށް ހަމަޖެހިފައިވާ އެ ޕާޓީގެ ކޮންގްރެސްގައި އަސާސީ ގަވާއިދު އިސްލާހު ކުރާނެއެވެ.
އެގޮތަށް އަސާސީ ގަވާއިދު އިސްލާހުކޮށްފައި ވާއިރު އަދި އައު އަސާސީ ގަވާއިދުގެ ދަށުން މަޤާމުތަކަށް ކުރިމަތިލުމުގެ ފުރުސަތު ވަނީ ހުޅުވާލައިފަ އެވެ.
މީގެ އިތުރުން ޖުމްހޫރީ ޕާޓީން ބުނެފައިވަނީ އަސާސީ ގަވާއިދަށް ބަދަލު ގެނައުމުގެ ބޭނުމަކީ އެ ޕާޓީގެ ރިޔާސީ ޓިކެޓަށް ވީހާވެސް ގިނަ ބަޔަކަށް ވާދަކުރެވޭ ގޮތް ހެދުން ކަމަށެވެ.
ޖުމްހޫރީ ޕާޓީގެ ކޮންގްރެސް ބޭއްވުމަށް ހަމަޖެހިފައިވަނީ މި މަހުގެ 21 އަދި 22 ވަނަ ދުވަހު ޕެރަޑައިސް އައިލެންޑް ރިސޯޓުގަ އެވެ.