ރޯދަ މަހު ހުޅުމާލޭގައި ހިނގި އެކްސިޑެންޓެއްގައި ޒަޚަމްވެގެން ޓްރީ ޓޮޕް ހޮސްޕިޓަލުން ފަރުވާ ދިން ޒުވާނެއްގެ ބިލް ބޮޑުވެ، އާއިލާ އަށް އެ ނުދެއްކިގެން އާއްމުންގެ އެހީތެރި ކަމަށް އެދެފި އެވެ.
މިދިޔަ ޖޫން މަހުގެ އެއް ވަނަ ދުވަހުގެ ރޭ ހުޅުމާލޭ ގެ ދެ ވަނަ ފިޔަވަހީގައި ހިނގި ސައިކަލް އެކްސިޑެންޓުގައި ބާރު ސްޕީޑެއްގައި ދުއްވާފައި ދަނިކޮށް، މަގު ބަންދުކުރަން ހުރަސްކޮށްފައި އޮތް ދަގަނޑު ހޮޅިއެއްގައި ޖެހިގެން ލ. ކަޅައިދޫ ޕެންޒީމާގޭ މުހައްމަދު ނިޒާމްގެ މޫނު ވަނީ ވަރަށް ބޮޑަށް ޒަޚަމްވެފަ އެވެ.
އެކްސިޑެންޓުގައި އޭނާގެ ކޯކަށިގަނޑާއި ނޭފަތުގެ ކަށިގަނޑުގެ އިތުރުން ނިތްކުރިމަތިން، ކަށިގަނޑާ އެކު ވަނީ ފަޅައިގެން ގޮސްފަ އެވެ. އަދި ލޯމަތިން ވެސް ފަޅައިގެން ގޮސް، ލޮލަށް ބޮޑެތި ގެއްލުންތަކެއް ލިބުނެވެ.
އޭނާއަށް ޓްރީ ޓޮޕްގެ އައިސީޔޫގައި ހަފުތާއެއްހާ ދުވަހު ފަރުވާދީފައިވެ އެވެ. އޭނާ މުޅިން ރަނގަޅުވެ މިދިޔަ ބުރާސްފަތި ދުވަހު ދޫކޮށްލަން ބެލިއިރު، ހޮސްޕިޓަލުގެ ބިލަށް އޮތީ 350،000 ރުފިޔާ އަރައިފައެވެ.
ނިޒާމްގެ އާއިލާއިން ބުނީ، އާސަންދަ އިން އެ ބިލަށް ލިބުނީ 18،000 ރުފިޔާ ކަމަށާއި އެންސްޕާއިން އެއްވެސް އެހީއެއް ނުލިބޭ ކަމަށެވެ. އެކަމަކު އިންޝުއަރެންސް ކަވަރު ކޮށްފައި އޮތުމުންނާއި ރަހުމަތްތެރިންގެ އެހީގައި އެ އާއިލާ އިން ވަނީ ބިލްގެ ތިން ބައިކުޅަ ދެ ބަޔަށްވާ ފައިސާ ހަމަކޮށްފަ އެވެ. ނިޒާމްގެ ބިލަށް ޓްރީ ޓޮޕް ހޮސްޕިޓަލުން 30 ޕަސެންޓުގެ ޑިސްކައުންޓެއް ދިންކަމަށް ވެސް އާއިލާއިން ބުންޏެވެ.
އާއިލާއިން ބުނާގޮތުގައި މިހާރު ބިލަށް އިތުރަށް ބޭނުންވަނީ 111،000 ރުފިޔާއެވެ. އެކަަމަކު ހޮސްޕިޓަލުގައި އޮންނަ ކޮންމެ ދުވަހަކަށް 1،800 ރުފިޔާ އަރަމުންދާ ކަމަށާއި އެ ބިލް ދެއްކުމުގައި އެހީތެރިކަން ފޯރުކޮށްދިނުމަށް އާއްމުންގެ ކިބައިން އެދޭ ކަމަށްވެސް އާއިލާއިން ބުނެއެވެ.
ނިޒާމް އެކްސިޑެންޓް ވީ ހުޅުމާލޭގެ ދެ ވަނަ ފިޔަވަހީގައި ހިއްކާފައިވާ ސަރަހައްދުން ދުއްވާފައި ދަނިކޮށެވެ.
މިދިޔަ ބުރާސްފަތި ދުވަހު ނިމުނު މި އަހަރުގެ ރޯދަ މަހު ހުޅުމާލޭގައި ހިނގި އެހެން އެކްސިޑެންޓުގައި ޒުވާނަކު މަރު ވެސް ވެފައި ވެ އެވެ.