އޮކްތިޔާބުސްކީ- ރަޝިޔާ: ފީފާ ވޯލްޑްކަޕް ފުޓްބޯޅަ މުބާރާތުގައި ކްރޮއޭޝިޔާ އާއި ނައިޖީރިއާ ބައްދަލުކުރި މެޗް ކްރޮއޭޝިޔާއިން ކާމިޔާބުކޮށްފިއެވެ.
ކަލިނިންގްރާދް ސްޓޭޑިއަމްގައި ކުޅުނު މިމެޗް ކްރޮއޭޝިޔާއިން ކާމިޔާބު ކުރީ 0-2 އިންނެވެ.
ތިރީސް ފަސް ހާހަށް ވުރެ ގިނަ ސަޕޯޓަރުންގެ ކުރިމަތީގައި ކުޅުނު މިމެޗްގެ ފުރަތަމަ ހާފްގައި ދެ ޓީމުގެ ފަރާތުން ވެސް ފެނިގެން ގޮސްފައި ވަނީ ހަމަހަމަ ކުޅުމެކެވެ.
އެހެން ނަމަވެސް ގިނަ ފުރުސަތުތައް ތަނަވަސްކޮށްފައި ވަނީ ކްރޮއޭޝިޔާގެ ކުޅުންތެރިންނެވެ.
އެގޮތުން މެޗްގެ 16 ވަނަ މިނިޓްގައި ކްރޮއޭޝިޔާގެ ކްރަމިރިޗް އަށް ލިބުނު ފުރުސަތު ފާހަގަކޮށްލެވެއެވެ. އޭރިޔާގެ ތެރޭގައި ހުރެފައި މަންޒުކިޗް ހުސްކޮށްލާފައި ދިން ބޯޅައެއް ކްރަމިރިޗް ފޮނުވާލުމުން ދިޔައީ ހުރަސް ދަނޑި މަތިން ބޭރަށެވެ.
ކްރޮއޭޝިޔާ އިން މިމެޗްގައި ޖެހި ފުރަތަމަ ލަނޑަކީ ނައިޖީރިއާގެ ޑިފެންޑަރު އެޓީބޯގެ އަތުން ބައިކޮޅަށް ވަން ލަނޑެކެވެ. މޮޑްރިޗް ނަގައިދިން ކޯނަރަކުން މާރިއޯ މަންޒުކިޗް ފޮނުވާލި ބޯޅަ ގޯލަށް ވަނީ ނައިޖީރިއާގެ އެޓީބޯގެ ފައިގައި ޖެހިފައެވެ.
މެޗްގެ ފުރަތަމަ ހާފް ނިމުނީ 0-1 އިން ކްރޮއޭޝިޔާ ކުރީގައި އޮވެގެންނެވެ.
ދެވެނަ ހާފު ފަށައިގެން ވެސް ގިނައިރު ބޯޅަ ގެންގުޅެ ހަމަލާތައް އުފައްދަން މަސައްކަތް ކޮށްފައިވަނީ ކްރޮއޭޝިޔާއިންނެވެ.
އެގޮތުން މެޗްގެ 54 ވަނަ މިނިޓްގައި ކްރޮއޭޝިޔާގެ ރެބިޗް އަށް އެ ޓީމުގެ ލީޑު ފުޅާ ކުރާނެ ރަނުގެ ފުރުސަތެއް ލިބުނެވެ. އޭރިޔާގެ ތެރޭގައި ހުސްކޮށް ހުރެ އޭނާ ފޮނުވާލި ބޯޅަ ގޯލަށް އަމާޒުކުރެވޭ ގޮތެއް ނުވިއެވެ.
ނައިޖީރިއާ އިން ވަނީ އެޓީމުގެ އެޓޭކު ވަރުގަދަ ކުރުމުގެ ގޮތުން 60 ވަނަ މިނިޓްގައި އެޓީމުގެ ފޯވާޑް އަހްމަދު މޫސާ ކުޅެން ނެރެފައެވެ. މި ބަދަލަށް ފަހު ވެސް ނައިޖީރިއާ އަށް މެޗްގެ ކޮންޓްރޯލް ލިބޭ ގޮތެއް ނުވިއެވެ.
ނައިޖީރިއާ އަށް އިތުރު މައްސަލަތަކެއް ކުރިމަތިވީ މެޗްގެ 71 ވަނަ މިނިޓްގައި ކްރޮއޭޝިޔާއިން އިތުރު ލަނޑެއް ޖެހުމުންނެވެ. ޕެނަލްޓީ އޭރިޔާ ތެރެއިން ކްރޮއޭޝިޔާގެ މަންޒުކިޗް އަށް ނައިޖީރިއާގެ ޑިފެންޑަރު ފައުލް ކުރުމުން ލިބުނު ޕެނަލްޓީ އަކުން މި ލަނޑު ކާމިޔާބު ކޮށްދިނީ ލޫކާ މޮޑްރިޗެވެ.
ނައިޖީރިއާ އަތުން ލިބުނު މޮޅާއި އެކު ކްރޮއޭޝިޔާއަށް ވަނީ ގްރޫޕްގެ އެއްވަނަ ލިބިފައެވެ. ކްރޮއޭޝިޔާއަށް ތިން ޕޮއިންޓް ލިބިފައިވާއިރު މި ގްރޫޕްގައި ނައިޖީރިއާގެ އިތުރުން ދެން ހިމެނޭ ދެ ޓީމު ކަމަށްވާ އާޖެންޓީނާ އަދި އައިސްލޭންޑަށް ވެސް ލިބިފައި ވަނީ 1 ޕޮއިންޓެވެ.
ކްރޮއޭޝިޔާ އިން ދެން މެޗެއް ކުޅޭނީ މިމަހުގެ 21 ވަނަ ދުވަހުއެވެ. އެ މެޗްގައި ބައްދަލުކުރާނީ އާޖެންޓީނާ އާއެވެ.