ފީފާ ވޯލްޑްކަޕް 2018ގެ ފުރަތަމަ މެޗްގައި ރޭ މެކްސިކޯ އަތުން ބަލިވި ނަމަވެސް އަދިވެސް ޖަރުމަނަށް މުބާރާތް ކާމިޔާބު ކުރެވޭނެ ކަމަށް އެ ޓީމުގެ ފޯވާޑް ޓީމޯ ވާނާ ބުނެފިއެވެ.
އުމުރުން 22 އަހަރުގެ ފޯވާޑް ބުނެފައިވަނީ ޖަރުމަނަކީ ކޮންމެ މެޗަކުން ވެސް މޮޅުވާން ބޭނުންވާ ޓީމެއް ކަމަށާއި މެޗުތަކުން ބަލިވުމަކީ ވެދާނެ ކަމެއް ކަމަށެވެ. ވާނާ ބުނީ ޖަރުމަނަށް އޮތީ ވީހާ ވެސް އަވަހަކަށް ދިމާވި މައްސަލަތަަކަށް ހައްލު ހޯދުން ކަމަށެވެ.
"ހަތަރު ވަނަ ނުވަތަ ފަސްވަނަ މެޗުން ބަލިވުމަށް ވުރެ ފުރަތަމަ މެޗުން ބަލިވުން މާ ރަނގަޅު، 2010 ވަނަ އަހަރުގެ ޗެމްޕިއަން ސްޕެއިން ވެސް އެ އަހަރު ފުރަތަމަ މެޗުން ބަލިވި" ވާނާ ބުންޏެވެ.
ވާނާ ބުނި ގޮތުގައި ޖަރުމަނުގެ ޓީމު ބަލިވީ އެޓީމަށް ހެދުނު ގޯސްތަކެއްގެ ސަބަބުން ކަމަށެވެ. އެހެން ނަމަވެސް އެއީ އުޒުރެއް ނޫން ކަމަށާއި މެކްސިކޯ އަކީ މޮޅު ޓީމެއް ކަމަށް އޭނާ ބުންޏެވެ.