ރަޝިޔާގައި މިހާރު ކުރިއަށްދާ ފީފާ ވޯލްޑްކަޕް 2018 ގައި ވާދަކުރާ ސައުދީ އަރަބިއްޔާގެ ފުޓްބޯޅަ ޓީމް ދަތުރު ކުރަމުން ދިޔަ ފްލައިޓްގައި އަލިފާން ރޯވެއްޖެ އެވެ.
ސައުދީ ޓީމު ދަތުރު ކުރަމުން ދިޔަ ފްލައިޓަކީ ރަޝިޔާގެ ޤައުމީ އެއާލައިނަށް ނިސްބަތްވާ އެއާބަސް މަރުކާގެ ފްލައިޓެކެވެ.
މި ހާދިސާ ހިނގާފައި ވަނީ ސައުދީގެ ޓީމް ވޯލްޑްކަޕްގައި އެ ޓީމް ކުޅޭ ދެ ވަނަ މެޗް ކުޅުމަށް ރަޝިޔާގެ ރޮސްޓޮވް އަށް ކުރި ދަތުރުގައި ރޮސްޓޯވް އެއާޕޯޓަށް ޖައްސަން އުޅެނިކޮށެވެ.
ފްލައިޓުގެ އިންޖީނުގައި އަލިފާން ރޯވި ނަމަވެސް ރައްކާތެރިކަމާއި އެކު ވަނީ ރޮސްޓޮވްއޮންޑޮންގެ އެއާޕޯޓަށް ޖައްސާފައެވެ.
އަދި މި ހާދިސާގައި ސައުދީ ޓީމުގެ އެއްވެސް ފަރާތަކަށް އަދި ބޯޓުން ދަތުރުކުރި މީހަކަށް އަނިޔާއެއް ލިބިފައިވާ ނުވާކަމަށް ރަޝިޔާގެ ނޫސްތަކުން ވަނީ ރިޕޯޓްކޮށްފައެވެ. މިކަން ސައުދީ ޓީމުން ނެރުނު ބަޔާނެއްގައި ވެސް ވަނީ ކަށަވަރުކޮށްދީފައެވެ.
މި ހާދިސާ ހިނގަން ދިމާވި ސަބަބު ރަޝިޔާގެ ކަމާބެހޭ ފަރާތްތަކުން މިހާރު އަންނަނީ ތަހުގީގް ކުރަމުންނެވެ.