ކުރިއަށް އޮތް ރިޔާސީ އިންތިޚާބުގައި ރައީސް އަބްދުﷲ ޔާމީންގެ ސަރުކާރު އިތުރު ދައުރަކަށް އިންތިޚާބު ކޮށްފިނަމަ ދިވެހިރާއްޖެ ދުވަހަކުވެސް އަތުނުވާނެ ކަމަށް ޤާނޫނީ ވަކީލް ހުސްނުއް ސުޢޫދު ވިދާޅުވެއްޖެއެވެ.
ސުއޫދު މިހެން ވިދާޅުވީ، "ޖަޒީރާ ރާއްޖެ" ކެމްޕޭނަށް މާލޭގައި ޖަގަހައެއް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މާލޭގައި ދިރިއުޅޭ އައްޑޫ ރައްޔިތުންނަށް ޚާއްސަކޮށްގެން ޤާއިމްކުރި މި ޖަގަހަ ހުޅުވައި ދެއްވީ ސުއޫދެވެ.
ޖަގަހަ ހުޅުވައި ދެއްވުމަށްފަހު ވާހަކަ ދައްކަވަމުން ސުއޫދު ވިދާޅުވީ، ރިޔާސީ އިންތިޚާބަކީ ރައްޔިތުން ވަރަށް މުހިންމު ނިންމުމެއް ނިންމަންޖެހޭ އިންތިޚާބެއްކަމަށާ އެ އިންތިޚާބުގައި ރައްޔިތުން ނިކުމެ ވޯޓްލައި ރައީސް ޔާމީން ވެރިކަމުން ދުރުކުރަންޖެހޭކަމަށެވެ.
ސަރުކާރަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުން ސުއޫދު ވިދާޅުވީ މި ފުރުސަތުގެ(ރިޔާސީ އިންތިޚާބުގެ ވޯޓްގެ) ބޭނުން ނުހިފައިފިނަމަ ރައީސް އަބުދުﷲ ޔާމީނަށް ދެވަނަ ދައުރެއް ލިބި ރާއްޖެ ދުވަހަކު ވެސް އަތު ނުޖެހޭނެ ހިސާބަށް ދާނެ ކަމަށެވެ.
މީގެ އިތުރުން ސުއޫދު ވަނީ ރައީސް ޔާމީންގެ ސަރުކާރާއި ދެކޮޅަށް އިދިކޮޅު ޕާޓީތަކުން ކުރާ މަސައްކަތުގައި ވީހާވެސް ގިނަ ބަޔަކު ބައިވެރިވުމަށް އެދިވަޑައިގެންފައެވެ.