ފީފާ ވޯލްޑްކަޕް ފުޓްބޯޅަ މުބާރާތުގައި ރަޝިޔާއިން ކުޅޭ ދެވަނަ މެޗް ބެއްލެވުމަށް އެގައުމުގެ ރައިސް ލެޑްމިއަރ ޕުޓިން އަށް ވަޑައިނުގެންނެވޭނެކަމަށް އެގައުމުގެ މީޑިއާތަކުން ރިޕޯޓުކޮށްފިއެވެ.
ޕުޓިން އަށް މިމެޗް ބަލަން ދަނޑަށް ވަޑައިނުގެންނެވެނީ، ރަސްމީ ދަތުރުފުޅެއްގައި އަވަށްޓެރި ބެލަރުސް އަށް ވަޑައިގަންނަވަން ޖެހޭތީއެވެ.
ޕުޓިންގެ އުފަން ސެއިންޓް ޕީޓަސްބާގް ގައި ކުޅޭ މެޗަށް އޭނާއަށް ހާޒިރުނުވެވޭތީ ރަޝިޔާގެ ބައެއް ރައްޔިތުން ދަނީ އެކަމަށް ފާޑު ކިޔަމުންނެވެ. މިކަމާއި ބެހޭގޮތުން ރަޝިޔާ ސަރުކާރުގެ ތަރުޖަމާނަކު ބުނެފައިވަނީ ޕުޓިންއަށް ވަގުތެއް ލިބިވަޑައިގަތުމުން މެޗްގެ އުސްއަލިތައް އެބޭފުޅާ ބައްލަވާނެ ކަމަށެވެ.
ރަޝިޔާއިން މުބާރަތުގެ ފުރަތަމަ މެޗްގައި ސައުދީއަރަބިއްޔާ އަތުން 0-5 އިން މޮޅުވި މެޗް ބައްލަވަން ޕުޓިން ވަޑައިގެންނެވިއެވެ.