ބޭރުގެ އެއްވެސް ގައުމަކުން ރާއްޖޭގެ ރިޔާސީ އިންތިހާބުގެ ކަންކަމުގެ ތެރެއަށް ވަނުމުގެ ފުރުސަތު ނުދޭނެ ކަމަށް އިލެކްޝަންސް ކޮމިޝަނުން ބުނުމުން އެކަމަށް އެމްޑީޕީގެ އެސްޖީ އަނަސް އަބްދުއްސައްތާރު ވަރުގަދަ ރައްދެއް ދެއްވައިފިއެވެ.
އިލެކްޝަންސްގެ ވާހަކަތަކާއި ގުޅިގެން ކުރެއްވި ޓްވީޓްގައި އަނަސް ވިދާޅުވީ، ރިޔާސީ އިންތިޚާބަށް ނުފޫޒު ފޯރުވަނީ ބޭރު ޤައުމުތަކުން ނޫންކަމަށާއި އެކަން ކުރައްވަނީ ރައީސް އަބްދުﷲ ޔާމީން ކަމަށެވެ.
އަނަސް ވިދާޅުވި ގޮތުގައި އިދިކޮޅު ފަރާތްތަކުން ދައްކަނީ ބޭރު ޤައުމުތަކުން އިންތިޚާބަށް ނުފޫޒު ފޯރުވާ ވާހަކައެއް ނޫން ކަމަށެވެ. އަދި އެފަރާތްތަކުން ދައްކަނީ، ރައީސް އަބްދުﷲ ޔާމީން އިލެކްޝަންސް ކޮމިޝަނަށް ނުފޫޒު ފޯރުވާ ވާހަކަ ކަމަށެވެ.
"އަޖައިބެއް ނުވާނެތާ. އަހަރުމުން މިކިޔަނީ ގައުމަކުން ނުފޫޒު ފޯރުވާ ވާހަކައެއް ނޫނޭ. ޔާމީނު ނުފޫޒު ފޯރުވާ ވާހަކަ. އޭނާ ތި ކޮމިޝަނަށް ނުފޫޒު ފޯރުވިޔަ ނުދޭށޭ" އަނަސް ކުރެއްވި ޓްވީޓްގައި ވިދާޅުވެފައިވެއެވެ.
އިންތިޚާބަށް ރައީސް ޔާމީން ނުފޫޒު ފޯރުވާކަމަށް އަނަސް ވިދާޅުވި ނަމަވެސް އެއްވެސް ފަރާތެއްގެ ނުފޫޒެއް ނޯންނާނެ ކަމަށް އިލެކްޝަންސް ކޮމިޝަނުން ވަނީ މީގެ ކުރިން ބުނެފައެވެ.