ފީފާ ވޯލްޑްކަޕް 2018ގައި ކޮލަމްބިޔާ އިން ކުޅޭ ފުރަތަމަ މެޗްގައި އެޓީމުގެ ޕްލޭމޭކަރ ޖޭމްސް ރޮޑްރިގޭޒް ނުފެނިދާނެ ކަމަށް މީޑިޔާ ރިޕޯޓްތައް ބުނެފިއެވެ.
އީއެސްޕީއެން އިން ރިޕޯޓްކޮށްފައިވާ ގޮތުގައި ފާއިތުވި ހުކުރު ދުވަހު ކޮލަމްބިއާ އިން ބޭއްވި ފަރިތަކުރުންތަކުގައި ވެސް ޖޭމްސް ބައިވެރިއެއް ނުވެއެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ކޮލަމްބިއާގެ ކޯޗް ހޯޒޭ ޕެކާމަން ބުނެފައިވާ ގޮތުން ޖޭމްސް އަށް ކުޅެވޭނެކަން އެނގޭނީ ޑޮކްޓަރުންގެ އެންމެ ފަހުގެ ބެލުންތަކަށް ފަހު އެމީހުންގެ ބަހެއް ލިބުމުން ކަމަށެވެ.
ޕެކާމަން ބުނިގޮތުގައި ޖޭމްސް ބޭނުން ނުކުރާނެ ކަމަށް ނިންމާނީ އެންމެ ފަހުވަގުތާއި ހަމައަށް ވެސް ބެލުމަށް ފަހުގައި ކަމަށެވެ. މީގެ އިތުރުން ޕެކާމަން ބުނީ ކޮލަމްބިއާގެ ސްކޮޑް 2014ގެ ވޯލްޑްކަޕަށް ވުރެ ވަރުގަދަ ކަމަށާއި ޖޭމްސް އަށް ނުކުޅެވުނު ނަމަވެސް އެތަން ފޫބައްދާނެ ކުޅުންތެރިން އެބަތިބި ކަމަށެވެ.
2014 ވަނަ އަހަރު ބްރެޒިލްގައި ބޭއްވި ވޯލްޑްކަޕްގައި ރަން ބޫޓް ޙާސިލްކުރި ޖޭމްސް އަށް ނުކުޅެވޭނެ ނަމަ އެއީ ކޮލަމްބިއާއަށް ވަރަށް ބޮޑު ގޮންޖެހުމަކަށް ވާނެއެވެ.