ސ. ހިތަދޫގައި ގިނަ ދުވަސްތަކެއް ވަންދެން އަމިއްލަ ކުލިނިކެއްގައި ހިދްމަތް ދެމުން އައި މަޝްހޫރު ޑޮކްޓަރު ޑރ. މެނަން ސިއްހީ ހާލަތު ހުރި ގޮތުން އަމިއްލަ ކްލިނިކް ދޫކޮށް ހިތަދޫގައި ހިންގާ ޕްރައިވެޓް ހޮސްޕިޓަލް އައިއެމްޑީސީ އާ މިދިޔަ ފެބްރުއަރީ މަހު ގުޅުމަށް ފަހު މާދަމާއިން ފެށިގެން އަނެއްކާ ވެސް އަމިއްލަ ކުލިނިކަށް ބަދަލުވާން ނިންމައިފި އެވެ.
"އައްޑޫ ލައިވް" އާ ވާހަކަ ދައްކަވަމުން ޑރ. މެނަން މިއަދު ވިދާޅުވީ އެނބުރި އަމިއްލަ ކުލިނިކަށް ބަދަލު ވަނީ އައިއެމްޑީސީގައި މަސައްކަތް ކުރައްވަން ބުރަވެގެންނެވެ.
ޑރ. މެނަން ވިދާޅުވީ ފާއިތުވި ފެބްރުއަރީ 28 އިން ފެށިގެން އައިއެމްޑީސީގައި ހިދްމަތް ކުރެއްވި އިރު ގިނަ ބަޔަކު އޭނާގެ ފަރާތުން ހިދްމަތް ހޯދާފައިވާ ކަމަށާއި، އައިއެމްޑީސީ ދޫކޮށްލަނީ އަމިއްލަ އިހްތިޔާރުގައި ކަމަށެވެ. އަދި އެތަނުގެ މެނޭޖްމަންޓުން އޭނާ އާ މެދު ބެހެއްޓެވި ގާތްކަމަށް މެނަން ޝުކުރު އަދާ ކުރެއްވި އެވެ.
އައިއެމްޑީސީއަށް ޑރ. މެނަން ބަދަލުވުމާ އެކު ގިނަ އަދަދެއްގެ ބަޔަކު ކިއޫ ހަދައިގެން ވަނީ ޑޮކްޓަރަށް ދައްކާފައެވެ. އެގޮތުން ދުވާލަކު އެވްރެޖްކޮށް 30 މީހުންނަށް މެނަން އައީ ފަރުވާ ދެމުންނެވެ.
"އައްޑޫ ލައިވް" އާ ވާހަކަ ދެއްކެވި ބައެއް އާއްމުން ބުނީ މެނަން އައިއެމްޑީސީގައި ހުރުމުން އާސަންދައިގެ ދަށުން ޑޮކްޓަރަށް ދައްކާ ބޭސް ފަރުވާ ކުރެވުނު ކަމަށެވެ. އެ ސަބަބާ ހެދި މެނަން އަށް ކިއު ހެދި ނަންބަރު ހޯދުމަށް ދިގު އިންތިޒާރުތައް ކުރަން ޖެހުނެވެ.
ޑރ. މެނަން ވިދާޅުވީ މާދަމާ އައިއެމްޑީސީ ދޫކުރި ނަމަވެސް އާދައިގެ މަތިން އޭނާގެ "ދިލްޝާދު ކްލިނިކް"ގައި ބަލި މީހުން ބައްލަވާނެ ކަމަށެވެ.