ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ އެކްސްރޭ މެޝިނަށް މައްސަލަ ޖެހި އެތަނުން އެކްސްރޭ ނުނެގޭތާ ދުވަސްތަކެއްވެއް އެވެ.
ހޮސްޕިޓަލުން ބުނި ގޮތުގައި އެކްސްރޭ ނުނެގެނީ އެކްސްރޭ މެޝިނަށް ޓެކްނިކަލް މައްސަލަތަކެއް ދިމާވެފައިވާތީއެވެ.
'އައްޑޫލައިވް' އާ ވާހަކަ ދެއްކި ހޮސްޕިޓަލުގެ އޮފިޝަަލަކު ބުނި ގޮތުގައި އެކްސްރޭ މެޝިނަށް ދިމާވެފައިވާ މައްސަލަ ރަނގަޅު ކުރުމުގެ މަސައްކަތް މިހާރު ދަނީ ކުރަމުންނެވެ.
ނަމަވެސް އެކްސްރޭ މެޝިނަށް ދިމާވެފައިވާ މައްސަލަ ހައްލުކުރަން ކިހާ ދުވަހެއް ނަގާނެ ކަން ބުނަން ނޭނގޭ ކަމަށެވެ.
ހިތަދޫ ހޮސްޕިޓަލުން އެކްސް ރޭ ނުނެގޭތީ އެކަމާއި ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ.
އައްޑޫގެ ގުޅިފައިވާ އަވަށްތަކުގެ މަގުތަކުގައި ނުރައްކާތެރި އެކްސިޑެންޓް ހިނގުމަކީ ވަރަށް އާއްމު ކަމެކެވެ. އެފަދަ އެކްސިޑެންޓްތަކުގައި އަނިޔާ ލިބޭ ފަރާތްތަކަށް ފަރުވާ ދިނުމަށް ކުރިމަތިވާނެ ބޮޑު ހުރަހެކެވެ.
މިހާރު ވެސް އެކްސިޑެންޓްތަކުގައި ބޮލަށް އަނިޔާ ލިބޭ މީހުންގެ ސީޓީ ސްކޭން ހެދޭނެ އިންތިޒާމެއް ހިތަދޫ ހޮސްޕިޓަލުގައި ނެތުމުން ފޮނުވަން ޖެހެނީ މާލެއަށެވެ.