ސަރަންސްކީ- ރަޝިޔާ: ފީފާ ވޯލްޑްކަޕް2018 ގައި ކޮލަމްބިއާ އާއި ޖަޕާން ބައްދަލުކުރި މެޗް 1-2 އިން ޖަޕާނުން ކާމިޔާބުކޮށްފިއެވެ.
މި މެޗް ފަށައިގެން 3 ވަނަ މިނިޓްގައި ކޮލަމްބިއާގެ ޑިފެންޑަރު ކާލޯސް ސަންޗޭޒަށް ވަނީ ރަތް ކާޑު ދައްކާފައެވެ.
އޭނާއަށް ރަތް ކާޑު ދެއްކީ، ޖަޕާނުގެ މިޑްފީލަޑަރު ކަގާވާ ގޯލަށް އަމާޒުކޮށް ފޮނުވާލި ބޯޅައެއްގައި ޕެނަލްޓީ އޭރިޔާ ތެރޭގައި ހުރެ އަތުން ޖެހުމުންނެވެ.
ސަންޗޭޒް އަތުން ބޯޅައިގައި ޖެހުމުން ލިބުނު ޕެނަލްޓީ ކާމިޔާބުކޮށްދިނީ ކަގާވާ އެވެ.
އެއް ކުޅުންތެރިޔަކު މަދުކޮށް ކުޅެން ޖެހުމުން ކޮލަމްބިޔާ އަށް މައްސަލަތަކެއް ދިމާވި ނަމަވެސް، އެޓީމުން ވަނީ ހާފު ނިމުމުގެ ކުރިން ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މިލަނޑު ކާމިޔާބުކުރީ ހިލޭ ޖެހުމަކުން ފެނާންޑޯ ކުއިންޓޭރޯ އެވެ.
ދެވަނަ ހާފު ފަށައިގެން ޖަޕާނުން ގިނަ ފުރުސަތުތަކެއް ތަނަވަސްކުރި އިރު އެޓީމުގެ 2 ވަނަ ލަނޑު މެޗްގެ 72 ވަނަ މިނިޓްގައި ކާމިޔާބުކޮށްދިނީ އޮސާކޯއެވެ.
ޖަޕާނުގެ ލަނޑަށް ފަހު ކޮލަމްބިޔާ އަށް ވަނީ ލަނޑު ޖަހާނަ ފުރުސަތު ތަކެއް ލިބިފައެވެ. އެގޮތުން ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޖޭމްސް ރޮޑްރިގޭޒް އަށް ލިބުނު ފުރުސަތު ފާހަގަކޮށްލެވެއެވެ.
މިއަދުގެ މެޗުން މޮޅުުވުމުން ޖަޕާނަށް ވަނީ 3 ޕޮއިންޓާއި އެކު ގްރޫޕްގެ 1 ވަނަ ލިބިފައެވެ. މި ގްރޫޕްގައި ހިމެނޭ އަނެއް ދެޓީމު ކަމަށްވާ ސެނަގަލް އާއި ޕޮލެންޑް ބައްދަލުކުރާ މެޗް ފަށާނީ މިރޭ 8 ޖަހާއިރުއެވެ.