ފީފާ ވޯލްޑްކަޕް 2018ގެ ރޭގެ މެޗުތައް ކާމިޔާބު ކުރި ޖަޕާނާއި ސެނެގާލްގެ ސަޕޯޓަރުން މުޅި ދުނިޔެއަށް ރީތި މިސާލެއް ދައްކައިދީފިއެވެ. އެގޮތުން އެ ދެޓީމުގެ ސަޕޯޓަރުން ވަނީ މެޗު ނިމުމަށްފަހު ސްޓޭޑިއަމްގެ ސިޑިބަރީތަކުގައި ހުރި ކުނިތައް ސާފުކޮށްފައެވެ.
އެންމެ ފުރަތަމަ ސްޓޭޑިއަމް ތެރޭގައި ހުރި ކުނިތައް ސާފުކޮށްފައިވަނީ އިއްޔެ ހަވީރު ކުޅުނު މެޗަށް ފަހު ޖަޕާނުގެ ސަޕޯޓަރުންނެވެ. ސޯޝަލް މީޑިޔާގައި ދައުރުވެފައިވާ ފޮޓޯތަކުން ފެންނަ ގޮތުގައި ޖަޕާނުގެ ސަޕޯޓަރުން ވަނީ ކޮލަމްބިޔާ އާއި ވާދަކުރި މެޗު ނިމުމަށް ފަހު ދަނޑުގައި މަޑުކޮށްފައެވެ.
އަދި އެ ފޮޓޯތަކުން ޑަސްބިން ބޭގުތައް ހިފައިގެން ޖަޕާނުގެ ސަޕޯޓަރުން ކުނިތައް ހޮވަމުން ދިޔަ މަންޒަރު ފެނެއެވެ. މިއީ މިފަދަ ގޮތަކަށް ޖަޕާނުގެ ސަޕޯޓަރުން އަމަލުކުރި ފުރަތަމަ ފަހަރެއް ނޫނެވެ. 2014 ވަނަ އަހަރުގެ ވޯލްޑްކަޕްގެ ތެރޭގައި ވެސް ޖަޕާނު ސަޕޯޓަރުން ވަނީ މިފަދަ ހަރަކާތްތަކެއް ކުރިއަށް ގެންގޮސްފައެވެ.
ސެނެގަލްގެ ސަޕޯޓަރުން ވެސް ވަނީ އިއްޔެ އެޓީމުން ސަމާރާ އެރީނާގައި ކުޅުނު މެޗަށް ފަހު ސާފުކުރުމުގެ ހަރަކާތެއް ހިންގާފައެވެ. ސެނެގަލްގެ ސަޕޯޓަރުން ފޯރީގައި ސްޓޭޑިއަމްގެ ސިޑިބަރި އަށް ޖަމާވެފައި ހުރި ކުނިތައް ސާފުކުރާ މަންޒަރު ފެންނަ ވީޑިއޯ އެއް އާޖެންޓީނާގެ ޓީވީ ޗެނަލަކުން ވަނީ ދެއްކާފައެވެ.
#TyCSportsMundial Senegal consiguió un triunfo histórico. Pero sus hinchas en lugar de festejar a minutos de terminado el partido, se encargan de limpiar su sector antes de retirarse. #RESPECT. pic.twitter.com/RiKovpfmoT
— TyC Sports (@TyCSports) June 19, 2018
https://platform.twitter.com/widgets.js
އެ ވީޑިއޯ އިން ފެންނަ ގޮތުގައި، ސެނެގަލް ސަޕޯޓަރުން ދިޔައީ ސިޑިބަރިތަކުގެ މައްޗަށް އުކާލާފައިވާ ކުނި އެއްތަނަކަށް ޖަމާކުރަމުންނެވެ.
ރޭގެ މެޗްތަކުން ޖަޕާނާއި ސެނެގާލް މޮޅުވުމަކީ އެ ދެ ޓީމަށް ވެސް ލިބުނު ބޮޑު ކާމިޔާބީއެކެވެ. އެގޮތުން ޕޮލެންޑް އަތުން ސެނެގާލް މޮޅުވިއިރު މިއީ މިފަހަރުގެ ވޯލްޑްކަޕްގައި އެފްރިކާގެ ޓީމަކުން ހޯދި ފުރަތަމަ މޮޅެވެ. ހަމަ އެފަދައިން ކޮލަމްބިއާ އަތުން ޖަރުމަނު ހޯދި މޮޅަކީ ވޯލްޑް ކަޕެއްގައި އޭޝިއާ ޓީމަކުން ސައުތް އެމެރިކާގެ ޓީމެއްގެ މައްޗަށް ކުރި ހޯދި ފުރަތަމަ ފަހަރެވެ.
ޖަޕާނާއި ސެނެގަލް ޓީމުގެ ސަޕޯޓަރުންނަށް ތައުރީފްކޮށް ގިނަ ބަޔަކު ބުނެފައިވަނީ ކާމިޔާބީ ފާހަގަކުރުމަށް ޕާޓީ ކުރުމުގެ ބަދަލުގައި އެ ދެޓީމުގެ ސަޕޯޓަރުން ދައްކާފައި ވަނީ ރީތި ނަމޫނާއެއް ކަމަށެވެ.