ޕީޕީއެމްގެ ފަރާތުން މިހާރު ކުރިއަށް ގެންދަނީ ރައީސް ޔާމީންގެ އަނބިކަނބަލުން ފާތިމަތު އިބްރާހިމްގެ ކެމްޕެއިނެއް ކަމުގައި އައްޑޫ މީދޫ ދާއިރާގެ މަޖިލިސް މެންބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ މިހެން ވިދާޅުވީ، ރާއްޖެޓީވީގެ "ފަލަ ސުރުޚީ" ޕްރޮގްރާމްގައި މިހާރުގެ ރައީސް އަބްދުﷲ ޔާމީން ކެމްޕެއިން ހަރަކާތްތަކުގައި ނުފެންނާތީ އެކަމާއި ބެހޭގޮތުން ވާހަކަ ދައްކަވަމުންނެވެ.
ރޮޒެއިނާ ވިދާޅުވި ގޮތުގައި 2013 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގައި ވެސް ރައީސް ޔާމީން އަށް ވުރެ ހަރަކާތްތެރިކޮށް އުޅުއްވީ ރަނިން މޭޓް ޑރ. ޖަމީލު ކަމަށެވެ. އަދި އޭގެ ފަހުން މި ސަރުކާރުގައި ވެސް އެންމެ ހަރަކާތްތެރިކޮށް އުޅުއްވީ ކުރީގެ ނައިބު ރައީސް އަހްމަދު އަދީބު ކަމަށެވެ.
"މިހާރު މިފެންނަނީ މެޑަމް ހުރިހާ ކަމެއްގައި އުޅުއްވާތަން. މެޑަމް ވަރަށް ހީވާގި އިނގޭތޯ. ހަމަ އަތުކުރި އޮޅުއްވާލައްވާފައި އެހެރަ ހަމަ ވަޑައިގެން ހަމަ އެބައުޅުއްވާ. އަސްލު މާ ރަނގަޅު ކެންޑިޑޭޓަކަށް މެޑަމް ގެންނަން."
ޕީޕީއެމްގެ ކެމްޕެއިން ހަރަކާތްތަކުން ފަސްޓް ލޭޑީ ފާތިމަތު އިބްރާހިމް ފެނިވަޑައިގަންނަވާކަން ފާހަގަކުރައްވައި ރޮޒެއިނާ ވިދާޅުވީ، ކެންޑިޑޭޓަކަށް 'މެޑަމް' ގެންނަން މާ ރަނގަޅު ކަމަށެވެ.
އޭގެ ސަބަބެއް ކަމަށް ރޮޒެއިނާ ވިދާޅުވީ، ކޮންމެ ހާލެއްގައި ވެސް "ކަދުރު ކޮތަޅު ހިއްޕަވައިގެން ވިޔަސް" ރައްޔިތުންނާއި ހަމައަށް ވަޑައިގަންނަވަނީ މެޑަމް އަށް ވުމެވެ.