ސަމާރާ-ރަޝިޔާ:ފީފާ ވޯލްޑްކަޕް 2018ގެ ގްރޫޕް ސީގައި ޑެންމާކާއި އޮސްޓްރޭލިއާ ބައްދަލުކުރި މެޗް 1-1 އިން އެއްވަރުވެއްޖެއެވެ.
ސަމަރާ އެރީނާގައި ކުޅުނު މި މެޗްގައި ފުރަތަމަ ލަނޑު ޖަހައި ލީޑު ނެގީ ޑެންމާކުންނެވެ. މި ލަނޑު މެޗްގެ 7 ވަނަ މިނިޓްގައި ކާމިޔާބުކޮށްދިނީ ކްރިސްޓިއަން އެރިކްސަން އެެވެ.
އޮސްޓްރޭލިއާއަށް މެޗުގެ ނަތީޖާ ހަމަހަމަ ކޮށްދިނީ މެޗްގެ 38 ވަނަ މިނިޓްގައި ލިބުނު ޕެނަލްޓީ އަކުން މިލޭ ޔެޑިނަކް އެވެ. މިއީ ވޯލްޑްކަޕްގައި އޭނާ ކާމިޔާބު ކުރި ދެވަނަ ލަނޑެވެ.
އޮސްޓްރޭލިއާ އަށް ޕެނަލްޓީ ދިނުމަށް ރެފްރީ ނިންމާފައިވަނީ ވީއޭއާރް އިން ބެލުމަށް ފަހުގައެވެ. މިއީ ވީއޭއާރް އިން ބެލުމަށްފަހު މިފަހަރުގެ ވޯލްޑްކަޕްގައި ދިން 5 ވަނަ ޕެނަލްޓީއެވެ.
މެޗްގެ ފުރަތަމަ ހާފް ނިމުނީ 1-1 އިން ދެ ޓީމް އެއްވަރުވެގެންނެވެ.
ދެވަނަ ހާފުގައި ދެޓީމުން ވެސް ލަނޑު ޖަހާނެ ފުރުސަތުތައް ތަނަވަސްކުރަން މަސައްކަތް ކުރި ނަމަވެސް މެޗްގެ ނަތީޖާ ބަދަލު ކުރެވޭ ގޮތެއް ނުވިއެވެ. ޖުމްލަ ގޮތެއްގައި ބަލާއިރު މިއަދުގެ މެޗްގައި ގިނަ ވަގުތު ބޯޅަ ގެންގުޅެފައިވަނީ އޮސްޓްރޭލިއާ އިންނެވެ.
މި ނަތީޖާ އާއި އެކު މުބާރާތުގައި މިހާތަނަށް ދެ މެޗް ކުޅެފައިވާ ޑެންމާކަށް 4 ޕޮއިންޓް ލިބިފައިވާ އިރު އޮސްޓްރޭލިއާ އަށް ލިބިފައިވަނީ އެންމެ ޕޮއިންޓެކެވެ.
އޮސްޓްރޭލިއާ އާއި ޑެންމާކަށް ވުރެ އެއް މެޗު މަދުން ކުޅެފައިވާ ފްރާންސަށް 3 ޕޮއިންޓް ލިބިފައިވާއިރު ޕެރޫ އަށް އަދި ޕޮއިންޓެއް ނުލިބެއެވެ.