ފީފާ ވޯލްޑްކަޕް 2018ގެ ގްރޫޕް ސީ ގައި ފްރާންސާއި ޕެރޫ ބައްދަލުކުރި މެޗުން މޮޅުވެ ފްރާންސުން ދެވަނަ ބުރުގެ ޖާގައެއް ކަށަވަރުކޮށްފިއެވެ.
އެކްތަރިންބާގް އެރީނާގައި ކުޅުނު މިމެޗް ފްރާންސުން ކާމިޔާބު ކުރީ 0-1 އިންނެވެ. މިމެޗްގައި ފްރާންސްގެ ހަމައެކަނި ލަނޑު މެޗްގެ 34 ވަނަ މިނިޓްގައި އެމްބާޕޭއެވެ.
އުމުރުން 19 އަހަރުގެ އެމްބާޕޭ ޖެހި މިގޯލާއި އެކު އޭނާ ވެގެން ގޮސްފައި ވަނީ ބައިނަލްއަޤްވާމީ މުބާރާތެއްގައި ފްރާންސަށް ލަނޑު ޖަހައިދިން އެންމެ ހަގު ކުޅުންތެރިޔާ އަށެވެ.
ފްރާންސުން 0-1 ލީޑެއްގައި އޮވެ ފުރަތަމަ ހާފު ނިންމާލި އިރު އެ ހާފުގައި ޕެރޫ އިން ވެސް ވަނީ ލަނޑު ޖަހާނެ ފުރުސަތުތައް ހޯދާފައެވެ.
އަދި މީގެ އިތުރުން ދެވަނަ ހާފުގައި ވެސް ޕެރޫ އަދި ފްރާންސަށް ވެސް މެޗުގެ ނަތީޖާ ބަދަލުކޮށްލާނެ ރަނގަޅު ފުރުސަތުތައް ލިބި ވަނީ ބޭކާރު ވެފައެވެ.
މިމެޗްގެ ނަތީޖާ އާއި އެކު ފްރާންސަށް ވަނީ 6 ޕޮއިންޓާއި އެކު ގްރޫޕްގެ 1 ވަނަ ލިބިފައެވެ. ޑެންމާކަށް 4 ޕޮއިންޓް ލިބިފައިވާއިރު އޮސްޓްރޭލިއާ އަށް ލިބިފައިވަނީ އެންމެ ޕޮއިންޓެކެވެ. އަދި ފްރާންސް އަތުން މިރޭ ބަލިވި ޕެރޫއަށް ޕޮއިންޓެއް ލިބިފައެއް ނުވެއެވެ.
ފްރާންސް ދެވަނަ ބުރުގެ ޖާގައެއް ހޯދާފައިވާއިރު ކުޅުނު ދެ މެޗުން ވެސް ބަލިވުމުން ޕެރޫ ވަނީ މުބާރާތުން ކަޓާފައެވެ.