ފީފާ ވޯލްޑްކަޕް 2018ގެ ގްރޫޕް ޑީގައި ކުޅުނު ދެވަނަ މެޗްގައި ކްރޮއޭޝިޔާ އަތުން ބަލިވެ އާޖެންޓީނާ އަށް އިތުރު ހާސްކަމަކާއި ކުރިމަތިވެއްޖެއެވެ.
މިރޭގެ މެޗްގައި އާޖެންޓީނާ އަތުން 0-3 އިން މޮޅުވުމުން ކްރޮއޭޝިޔާ އަށް ވަނީ ދެވަނަ ބުރުގެ ޖާގައެއް ކަށަވަރުވެފައެވެ.
ކްރޮއޭޝިޔާގެ ފުރަތަމަ ލަނޑު ކާމިޔާބު ކޮށްދިނީ އާޖެންޓީނާގެ ކީޕަރަށް ހެދުނު ގޯހެއްގެ ފައިދާ ނަގައި އަންޓޭ ރެބިޗެވެ. އަދި އެ ޓީމުގެ ދެވަނަ ލަނޑު މެޗްގެ 81 ވަނަ މިނިޓްގައި ކާމިޔާބުކޮށްދިނީ ލޫކާ މޮޑްރިޗެވެ.
އަދި އެޓީމުގެ 3 ވަނަ ލަނޑު އެންމެ ފަހު ވަގުތުކޮޅުގެ ތެރޭގައި ކާމިޔާބުކޮށްދިނީ އިވާން ރަކިޓިޗް އެވެ.
އާޖެންޓީނާ އިން ގްރޫޕް ސްޓޭޖްގައި ދެ މެޗް ކުޅެފައިވާއިރު އެޓީމަށް ލިބިފައިވަނީ އެންމެ ޕޮއިންޓެކެވެ. އާޖެންޓީނާ އަށް ވުރެ އެއް މެޗް މަދުން ކުޅެފައިވާ އައިސްލޭންޑަށް ވެސް ވަނީ އެއް ޕޮއިންޓް ލިބިފައެވެ.
އެހެންވެ މާދަމާ ރޭ މި ގްރޫޕްގައި އައިސްލޭންޑާއި ނައިޖީރިޔާ ވާދަކުރާ މެޗުން އައިސްލޭންޑް މޮޅުވެއްޖެ ނަމަ އާޖެންޓީނާ އަށް ދެވަނަ ބުރަށް ދިއުމަށް އޮތް ފުރުސަތު އިތުރަށް ހަނި ވެދާނެއެވެ.
ގްރޫޕް ޑީގެ އެއްވަނައިގައި ކްރޮއޭޝިޔާ އޮތީ ކުޅުނު ދެ މެޗުން މޮޅުވެ ލިބުނު 6 ޕޮއިންޓާއި އެކުގައެވެ. އެޓީމަށް ވަނީ މިހާރު ދެވަނަ ބުރުގެ ޖާގައެއް ކަށަވަރު ވެފައެވެ.