އާޖެންޓީނާގެ ފޯވާޑް ލިއޮނަލް މެސީ އަކީ މޮޅު ކުޅުންތެރިއެއް ކަމަށާއި އެހެން ނަމަވެސް އޭނާ އަށް އެކަނި ހުރިހާ ކަމެއް ނުކުރެވޭނެ ކަމަށް ކްރޮއޭޝިޔާގެ ކެޕްޓަން ލޫކާ މޮޑްރިޗް ބުނެފިއެވެ.
މެސީގެ ދިފާއުގައި މޮޑްރިޗް ވާހަކަ ދައްކާފައި މިވަނީ ރޭ ކްރޮއޭޝިޔާ އަތުން ބަލިވެ އާޖެންޓީނާ ވޯލްޑްކަޕުން ކެޓުމުގެ ބިރު ބޮޑުވުމާއި ގުޅިގެން މެސީއަށް ގިނަ ބަޔަކު ފާޑުކިޔަމުން ދަނިކޮށެވެ.
އާޖެންޓީނާގެ ޓީވީއެއް ކަމުގައިވާ "ޕަބްލިކާ" އަށް ދިން އިންޓަވިއު އެއްގައި މޮޑްރިޗް ބުނީ ފުޓްބޯޅައިގައި (ކާމިޔާބު ހޯދުމަށް) އެހެން ކުޅުންތެރިންގެ އެހީތެރިކަން ބޭނުންވާނެ ކަމަށެވެ. އަދި މެސީ މޮޅު ކުޅުންތެރިޔަކަށް ވިޔަސް އެހެން ކުޅުންތެރިންގެ އެހީތެރިކަމާއި ނުލައި އެކަން ނުކުރެވޭނެ ކަމަށް މޮޑްރިޗް ވަނީ ބުނެފައެވެ.
މޮޑްރިޗް ބުނި ގޮތުގައި ރޭގެ މެޗްގައި އާޖެންޓީނާއަށް ރަނގަޅަށް ނުކުޅެވުނީ ކްރޮއޭޝިޔާގެ ގޭމް ޕްލޭން ރަނގަޅު ވުމުގެ ސަބަބުން ކަމަށެވެ. އަދި މެސީއަށް ބޯޅަ ފޯރުކޮށްދިނުން ހުއްޓުވުމަށް ޚާޢްސަ އިސްކަމެއް ކްރޮއޭޝިޔާ ޓީމުން ކުރި ކަމަށް މޮޑްރިޗް ވަނީ ބުނެފައެވެ.