މޭވާ ކާން ކިހާ ވަރަކަށް ބޭނުންވޭ ބާވަ އެވެ؟ މޭވާ ކާން ހިތްވޭ ހެއްޔެވެ؟ ޔަގީންވާ ކަމަކީ މޭވާއަކީ ހަށިގަނޑަށް ވަރަށް ފައިދާ ހުރި އެކި އުމުރުގެ މީހުންނަށް އެންމެ ފައިދާ ލިބޭ އެއް ކާނާ ކަމަށެވެ.
ގަދަ ކުލަތަކުގެ މޭވާ އާއި ބެރީޒް ވައްތަރުތައް ބޭނުން ކުރުމުން ސިއްހަތު ދުޅަހެޔޮވުމާ އެކު ކެންސަރުން ރައްކާތެރިވުމަށް ބޮޑު އެހީތެރިކަމެއް ފޯރުކޮށް ދޭ ކަމަށް ސިއްހީ މާހިރުން ބުނެފި އެވެ.
ސައިންސްވެރިން ބުނެފައި ވަނީ ތަފާތު ބާވަތްތަކުގެ ބެރީޒް ބޭނުން ކުރުމުގެ ސަބަބުން ސިއްހީ ގޮތުން ކުރާ ސިއްހީ ފައިދާތައް ދެނެ ގަތުމަށް އިންސާނުންގެ ކުޅު ބޭނުންކޮށްފައިވާ ކަމަށާއި ކުލަގަދަ ވައްތަރުތަކެއް ކަމުގައިވާ ބެރީޒް އާއިލާއަށް ޚާއްސަ ބާވަތްތައް ބޭނުން ކުރުމުގެ ސަބަބުން ލިބޭ ސިއްހީ ފައިދާތައް ދެނެގަތުމަށް ކުރަމުންދާ މަސައްކަތް އަދިވެސް ކުރިއަށްދާ ކަމަށެވެ.
ސިއްހީ ގޮތުން އެންމެ ފައިދާ ހުރީ ކޮން ބާވަތެއްގެ ބެރީޒުން ބުނަން ދަތި ކަމަށާއި ނަމަވެސް ބެރީޒް އާއިލާގެ ބާވަތްތަކުގައި ހިމެނޭ ކުލަތަކުގެ ސަބަބުން ހަށިގަނޑަށް ފައިދާ ހުރި ދެ މާއްދާއެއް އުފައްދާ ކަމަށް ސައިންސްވެރިން ބުނެ އެވެ. އެ ދެ މާއްދާގެ ސަބަބުން ސިއްހަތަށް ގިނަ ފައިދާތަކެއް ކުރާ ކަމަށް ވެސް މިކަމާ ގުޅޭ ގޮތުން ދިރާސާ ހެދި ޓީމުން ބުންޏެވެ.
އޭގެ ތެރެއިން އެއް މާއްދާ ކަމަށްވާ އެންތޯކިއަނިންއަކީ، އަނގައިގެ ބަލިތަކުން ރައްކާތެރިވުމަށް މުހިންމު މާއްދާއެއް ކަމަށާއި ބެރީޒް އާއިލާގެ ބާވަތްތަކުގައި އެ މާއްދާ ގިނަ އަދަދަކަށް ހިމެނޭ ކަމަށް ސައިންސްވެރިންގެ ތަހުލީލުތަކުން ދައްކަ އެވެ.
ސައިންސްވެރިން ވަނީ ތަފާތު 14 މީހެއްގެ ކުޅު ނަގައިގެން ބެރީގެ އާއިލާގައި ހިމެނޭ ބްލޫ ބެރީ، ޗޮކްބެރީ، ބްލެކް ރާސްބެރީ އާއި ރެޑް ގްރޭޕްސްގެ އިތުރުން ސްޓްރޯބެރީގައި ހިމެނޭ އެންތޯކިއަނިން ޓެސްޓްކޮށްފަ އެވެ.
މި ޓެސްޓުތަކުން ނިކުތް ނަތީޖާތަކަށް ފަހު ސިއްހީ މާހިރުން ބުނެފައި ވަނީ، ބެރީޒްގެ އާއިލާގައި ހިމެނޭ ބާވާތްތައް ބޭނުން ކުރުމުގެ ސަބަބުން އަނގައިގެ ކެންސަރު ޖެހުމުން ސަލާމަތްކޮށްދޭ ކަމަށެވެ.
ކޮންމެ މޭވާއަކީ ވެސް ގުދުރަތީ ގޮތުން ހަށިގަނޑަށް ފައިދާ ހުރި ގިނަ މާއްދާތަކެއް އެކުލެވޭ ބާވަތްތަކެއް ކަމުން މިފަދަ ބާވަތްތައް ބޭނުން ކުރުމުގައި ވީހާ ވެސް ގިނަ ކުލަތަކުގެ މޭވާ ބޭނުން ކުރުމަކީ މުހިންމު ކަމެކެވެ.