ހިޓްލަރު: ދުނިޔެ ދުށް ބޮޑު އަނިޔާވެރިއެއް

އެޑޯލްފް އެލުއިސް ހިޓްލަރު އުފަންވެފައި ވަނީ އޭޕްރީލް، 20 1889 ގައި އޮސްޓްރިއާގެ ބްރަނާއު ކިޔާ އަވަށަކަށެވެ. އޭނާގެ އާއިލާއަކީ ފަގީރު އާއިލާއެކެވެ.

ހިޓްލަރުގެ ބައްޕަގެ ނަމަކީ އެލުއިސް ހިޓްލަރ އެވެ. އޭނާގެ ބައްޕަ އަކީ ކަސްޓަމް ދާއިރާގެ މަސްއޫލުވެރިއެކެވެ. މަންމަގެ ނަމަކީ ޝިކްލްގްރޫބަރ ނުވަތަ ކްލާރާއެވެ. އެނާއަކީ ރަށްފުށުގެ ނިކަމެއްޗެކެވެ.

ހިޓްލަރގެ ޢުމުރުގެ ކުރީކޮޅު ހޭދަ ކުރަން ޖެހުނީ ރަށްފުށުގެ ދަތި އުނދަގޫ ދިރިއުޅުމުގެ ތެރޭގައެވެ. އޭނާގެ ޢުމުރުން 13 އަހަރުގައި، އޭނާގެ ބައްޕަ ވަނީ ކުއްލި މަރަކުން ދުނިޔެ ދޫކޮށްފައެވެ. ކެންސަރު ބައްޔާއި ހަނގުރާމަ ކުރުމަށްފަހު ހިޓްލަރ ގެ އުމުރުން 18 އަހަރުގައި އޭނާގެ މަންމަވެސް ވަނީ ދުނިޔެ ދޫކޮށްފައެވެ.

1913 ވަނަ އަހަރުގެ ތެރޭގައި ހިޓްލަރ ވަނީ ޖަރުމަނަށް ހިޖުރަ ކޮށްފައެވެ. ޖަރުމަނަށް ހިޖުރަ ކުރުމަށްފަހު އެތާނގެ ޚާރިޖީ ސިޔާސަތާއިމެދު ހިޓްލަރ ފާޑުކިޔަން ފެށިއެވެ. ޖަރުމަނާއި އިޓަލީއާއި، ހަންގޭރިއާއި، އޮސްޓްރިއާގެ ކޯލިޝަންއަކީ ނިކަމެތި، ދެމިނޯންނާނެ ގުޅުމެއްކަމަށް އޭނާ ހާމަކުރިއެވެ. އޭގެ ބަދަލުގައި، ރަޝިޔާއާއި އިނގިރޭސިންނާއި ގުޅުން ބަދަހި ކުރުމަށް، ޖަރުމަނުގެ އިސްވެރިންނަށް އޭނާ ނަޞޭޙަތްތެރިވިއެވެ.

ހިޓްލަރ ގެ ހަޔާތް ބަދަލު ކޮށްލީ 1914 ވަނައަހަރުން 1918 އަށް ކުރެވުނު ފުރަތަމަ ބޮޑު ހަނގުރާމަ އިންނެވެ. އެ ހަނގުރާމަ ވެގެން ދިޔައީ އޭނާގެ ޙަޔާތް ބަދަލު ކޮށްލި އެންމެ ބޮޑު ސަބަބު ކަމުގައެވެ. ޖަރުމަނު ސިފައިންގެ ތެރޭން އެ ހަނގުރާމައިގާ އޭނާއަށް ޖާގަ ލިބުނެވެ. ސިފައިންގެ ޚިދުމަތްވީ ހިޓްލަރަށް ހިތްހަމަޖެހުން ލިއްބައިދިން ޚިދުމަތެއްކަމުގައެވެ. އަދި 1914 ވަނަ އަހަރު، ފުރަތަމަ ފަހަރަށް ޝަރަފުވެރިކަމުގެ މެޑެއްޔެއް އޭނާގެ ކަރުގައި އެޅުވުނެވެ.

1919 ވަނަ އަހަރު، ޖަރުމަނުގެ ލޭބަރ ޕާރޓީގެ މެންބަރަކަށް ވުމުގެ ނަޞީބު ހިޓްލަރަށް ލިބުނެވެ. ހިޓްލަރ އަށް ކުރިއެރުން ލިބެމުން ދިޔައީ ހަލުވި ކަމާއެކުގައެވެ. މާގިނަ ދުވަހެއްނުވެ، ޕާރޓީގެ ވެރިއަކަށް އޭނާ އިސްކުރެވުނެވެ. އޭނާގެ މަސައްކަތުން އެންމެ ދެ އަހަރުގެ ތެރޭގައި މިކުޑަކުޑަ ޕާރޓީގެ ނަން މަޝްހޫރު ޕާރޓީއަކަށް ބަދަލުކޮށްލިއެވެ. އަދި ޕާރޓީގެ ނަމަށް ނެޝަނަލް ސޯޝަލިސްޓު އިތުރުކުރެވުނެވެ. މިގޮތުން މިޕާރޓީއަށް ކިޔުނު ފުރިހަމަ ނަމަކީ، ނެޝަނަލް ސޯޝަލިސްޓް ޖަރމަން ވޯރކާރސް ޕާރޓީއެވެ. މިޕާރޓީއަށް ގެ ނަން ކުރުކޮށް މަޝްހޫރުވެފައިވަނީ ނާޒީގެ ނަމުންނެވެ. ހިޓްލަރގެ ޒަޢާމަތުގެ ދަށުގައި ޕާޓީއަށް ވަންނަން ބޭނުންވާ މީހުންގެ ޢަދަދު، ދުވަހެއް ދުވަހަކަށް އިތުރުވަމުންދިޔައެވެ. މީހުންގެ މެދުގައި މަޤްބޫލު މީހަކަށް އޭނާވިއެވެ.

ބިއަރ ހޯލްގައި ގެންނަން މަސައްކަތްކުރި، ޢަސްކަރީ އިންޤިލާބު ނާކާމިޔާބުވެ ޚިޔާނާތުގެ ތުހުމަތުގައި، ހިޓްލަރ ޖަލަށްލެވުނެވެ. ހިޓްލަރާއި އޭނާއާއިއެކު އިންޤިލާބުގައި ބައިވެރިވި ކޮމާންޑަރުންގެ ޝަރީޢަތް 1924 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހު އޮތެވެ. އެޝަރީޢަތް ނިމުނީ 5 އަހަރަށް ހިޓްލަރ ޖަލަށްލުމަށް ޙުކުމްކުރެވިގެންނެވެ. ޖަލަށް ލީނަމަވެސް 8 މަހާއި ކުޑަދުވަސްކޮޅަކަށްފަހު އޭނާ ޖަލުން މިނިވަންކުރެވުނެވެ.

ޖަލުން މިނިވަންވުމަށްފަހު، ޖަރުމަނުގައި އޭރު އޮތް ވެރިކަމާއި ދެކޮޅަށް އޭނާ އަޑު އުފުލަމުން ދިޔައެވެ. އޭނާ ބުނަމުން ދިޔައީ އޭރުގެ ޖަރުމަނަކީ ޖުމްހޫރިއްޔަތެއް ނުވަތަ ޑިމޮކްރެސީއެއް ނޫންކަމަށެވެ. އަދި އެއީ " ޔަހޫދީ އޫރުންގެ" ބާރުގެ ދަށުގައިވާ ދައުލަތެއް ކަމަށް އޭނާ ބުނެފައިވެއެވެ. 1920ވަނަ އަހަރުގެ ތެރޭގައި، ނާޒީންނާއި ކޮމިއުނިސްޓުންނާއި ދެމެދު ހިނގި ކުރިމަތިލުންތަކެއްގައި، ދެފަރާތުގެ އެތައް ބަޔަކު ނެތި ފަނާވެގެން ގޮސްފައެވެ. 1930 ވަނަ އަހަރުގެ އާންމު އިންތިޚާބަށް ފަހު ހިޓްލަރގެ ޕާރޓީގެ ކާމިޔާބީތަކުގެ މަރުޙަލާތައް ފެށުނެވެ. ކާމިޔާބީގެ ހަރުފަތްތައް ގިރާ ކުރަމުން ދިޔައީ ހަލުވި ކަމާއެކުގައެވެ. އޭގެ ދެއަހަރު ފަހުން ޖަރުމަނުގެ އެންމެ ކާމިޔާބު ޕާޓީއަކަށް މިޕާޓީ ވެގެންދިޔައެވެ.

ހިޓްލަރ ވެގެންދިޔައީ ޔަހޫދީންނަށް ވަރަށް ބޮޑަށް ނަފުރަތު ކުރާ މީހަކަށެވެ. އޭނާގެ ނަޒަރުގައި ޖަރުމަނަށް ކުރިމަތިވި ހުރިހާ ނިކަމެތިކަމަކާއި މުޞީބާތްތަކުގެ އަޞްލަކީ ޔަހޫދީންނެވެ.އަދި ޔަހޫދީންނަކީ ޚިޔާނާތްތެރި، ތެދުވެރިކަމެއް ނެތް ބައެއް ކަމުގައިވެސް އޭނާ ސިފަކުރަމުންދިޔައެވެ. އެމީހުންނަކީ ގޮތްކުޑަ، ދަށް ފަންތީގެ ބައެއްކަމަށާއި، އިންސާނީ ދަރިފަސްކޮޅުގެ ދުޝްމިނުންތަކެއް ކަމަށްވެސް، އޭނާ ހާމަކޮށްފައިވެއެވެ. ޔަހޫދީއެއްގެ ލޭ އޮހޮރުވާލައިފިނަމަ، ކަންތައްތައް ކުރިއަށްވުރެ ދެގުނައަށް އިޞްލާޙުވާނެ ކަމަށް ހިޓްލަރު ބުނެފައިވެއެވެ.

މަސީޙީންނަކީވެސް ހިޓްލަރ ގާތުގައި މާ މަޤުބޫލު ބަޔަކަށް ނުވިއެވެ. ކްރިސްޓިއަނިޓީއަކީ އޭނާ ދެކުނު ގޮތުގައި ޔަހޫދީންގެ މެދުން އުފެދިފައިވާ ނިކަމެތި ތާކުންތާކު ނުޖެހޭ ދީނެކެވެ. އަދި އެދީން ބިނާވެފައިވަނީ އެއްވެސް އަސާސެއްގެ މައްޗަށް ނޫންކަމަށްވެސް އޭނާ ދެކެފައިވެއެވެ.

ހިޓްލަރ މުޅި ދުނިޔެއާއި ދެކޮޅަށް 1 ސެޕްޓެމްބަރ 1939 ގައި ހަނގުރާމަ އިއުލާން ކުރިއެވެ. އަދި 1941ގެ ޖޫންގައި ރަޝިޔާއަށް އޭނާ ޙަމަލާދިނެވެ. އަދި ހަމަ އެއަހަރުގެ ޑިސެމްބަރުގައިއެމެރިކާއަށް ވެސް އޭނާ ޙަމަލާދީފައިވެއެވެ. އޭނާގެ އަނިޔާވެރިކަން ދިޔައީ ހައްދުން ނެއްޓެމުންނެވެ.

ހިޓްލަރގެ ހަނގުރާމަތަކާއި މީހުންނާއި މެދު މުޢާމަލާތް ކޮށްފައިވާގޮތަށް ބަލާއިރު 20 ވަނަ ޤަރުނުގައި ދުނިޔެ ދުށް އެންމެ ހަރުކަށި އިންސާނާގެ ގޮތުގައި އޭނާ ސިފަކުރެވެއެވެ. އޭނާގެ ކޭމްޕު ތަކުގައި ގާތްގަނޑަކަށް 12 މިލިއަނަށްވުރެ ގިނަ މީހުން މަރާލާފައިވާކަމަށް ބެލެވެއެވެ. އަދި މީސްމީހުންނަށް އަނިޔާދިނުމަށްޓަކައި އެންމެ އަނިޔާވެރި ގޮތްގޮތަށް މީހުންމަރާނެ ލަފާދޭ ޑޮކްޓަރުންވެސް އޭނާ ގެންގުޅެފައިވެއެވެ. ހިޓްލަރގެ އަނިޔާވެރިކަމުގެ ތެރެއިން، އެންމެ އަނިޔާވެރިގޮތެއްގައި މީހުން މެރުމުގެ ޢަމަލުކަމުގައި ބެލެވެނީ، މަޢްދަން ޗެމްބަރ ތަކަށް މީހުން އަޅައި އަންދާލުމެވެ. މިކަމަށް ކިޔައިއުޅެނީ ހޮލޯކާސްޓުއެވެ.

ހިޓްލަރގެ އަނިޔާވެރިކަމާއި ހަރުކަށިކަން، ގުޅިފައިވަނީ، އޭނާގެ ޅަފުރައިގެ ދުވަސްތަކުގައި، ތަޙައްމަލުކުރަން ޖެހުނު، އަނިޔާވެރިކަމުން އޭނާއަށް އައިސްފައިވާ ނަފުސާނީ ބަދަލުތަކާއި ކަމަށް ބައެއް މީހުންދެކެއެވެ. އިންސާނިއްޔަތު ކަމެއްނެތް އަމަލުތައް ކުރުމުގައި އޭނާ އަކީ ފާހަގަކޮށްލެވުނު މީހެކެވެ. ތާރީޚު ހެކިދޭނެ އެތައް އަމަލެއް އޭނާ ވަނީ ހިންގާފައެވެ.

ހިޓްލަރ ދުނިޔެ ދޫކޮށްފައިވަނީ 1945 ވަނަ އަހަރުގެ އޭޕްރީލް މަހުގެ 30 ވަނަ ދުވަހުއެވެ. އޭނާ މަރުވެފައިވަނީ އަމިއްލަ އަށް ބޮލަށް ބަޑި ޖަހައިގެން ކަމަށްވެއެވެ.

ހިޓްލަރ އަކީ ކާމިޔާބު ލިބުނު މީހެކެވެ. އެހެން ނަމަވެސް އޭގެ ފައިދާ އެންމެ ނާޖާއިޒު ގޮތުގައި ނެގި މީހެކެވެ. އަނިޔާވެރިކަން އިންތިހާއަށް ގެންދިޔައިރު ފަހުން ވާނީ ކިހިނެތްތޯ އެއީ އޭނާ ކުރި ސުވާލެއް ނޫނެވެ. ތާރީޚުގައި އޭނާގެ ނަން ވަނީ ލިޔެވިފައެވެ. އެހެން ނަމަވެސް މީހުން ލޯބިވާނެ ފަދަ ގޮތަކަށް ނޫނެވެ. ދުނިޔެ ދުށް ކަޅު ދުވަސްތަކެއްގެ އަސްލެއް ގޮތުގައެވެ. އެތައް ބައެއްގެ ދިރިއުޅުން ފަނާ ކޮށްލި އަނިޔާވެރިއެއްގެ ގޮތުގައެވެ. އެތައް ބައެއް ގަތުލު ކޮށްލި ގާތިލެއްގެ ގޮތުގައެވެ. އާދެ ! 20 ވަނަ ގަރުނުގެ އަނިޔާވެރިޔާގެ ގޮތުގައެވެ.