އައްޑޫ ސިޓީ ކައުންސިލުން ބޭއްވި ޤުރުއާން މުބާރާތުން މުޅި މުބާރާތުގެ އެއް ވަނަ ހިތަދޫ ސްކޫލްގެ ދަރިވަރު މަރިޔަމް ޒަހްވާ އާދިލް ހޯދައިފި އެވެ.
މުބާރާތުގެ އިނާމް ފާޅު ކުރަން ރޭ ނޫރާނީ ސްކޫލްގައި ބޭއްވި ހަފުލާގައި މުބާރާތުގެ ދެވަނަ ގެންދިޔައީ ފޭދޫ ސްކޫލުގެ ދަރިވަރު އައިޝަތު އަމާނީ އިޖްތިހާދު އެވެ.
މުބާރާތުން ތިންވަނަ އަށް ހޮވުނީ ޝަމުސުއްދީން ސްކޫލުގެ ދަރިވަރު އައިޝަތު މަންހާ ޖަލީލެވެ.
ވަނަތަކަށް ހޮވުނު ދަރިވަރުންނަށް އިނާމު ހަވާލުކޮށް ދެއްވީ ރަސްމިއްޔާތުގެ ޝަރަފުވެރި މެޙްމާނު އައްޑޫގެ ޑެޕިއުޓީ މޭޔަރު މުޙައްމަދު ޔަސްރިފެވެ.
ކައުންސިލުން ބޭއްވި މި މުބާރާތަކީ ކުދިންގެ ހިތްތަކުގައި ޤުރުއާނަށް އޮންނަ ޝައުގުވެރިކަން އިތުރުކޮށް ފަރިތަކަންމަތީ ތަރުތީލުކޮށް ޤުރުއާން ކިޔަވަން އެނގޭ މުޖުތަމަޢުއެއް ބިނާ ކުރުމުގެ މަގުސަދުގައި ބޭއްވި މުބާރާތެކެވެ.
މުބާރާތުގައި އައްޑޫގެ 11 ސްކޫލަކުން ބައިވެރިވެފައިވާ އިރު، އެއް ވަނަ ސްކޫލަކަށް ހޮވުނީ ހުޅުދޫ ސްކޫލެވެ.
އައްޑޫ ޤުރުއާން މުބާރާތް ބާއްވާނީ ކޮންމެ އަހަރަކު އެއް ފަހަރުއެވެ.
މި ފަހަރުގެ މުބާރާތުގައި ފަނޑިޔާރުކަންކޮށް ދެއްވީ އަލްޤާރީ އަޙްމަދު ތައުފީޤު، އަލްހާފިޒް އިބްރާހިމް ޒުހައިރު އަދި އަލްހާފިޒް މުޙައްމަދު ވަހީދެވެ.
މި މަހުގެ 21-23 އަށް ބޭއްވި މުބާރާތް ކުރިއަށް ގެންދިޔައީ އުމުރުން 7، 9، 11، 13، 16 އަދި 21 އަހަރުން ދަށުގެ އުމުރުފުރާތަކަށް ހާއްސަކޮށްގެންނެވެ.
އެގޮތުން މުބާރާތުގައި ޖުމްލަ 122 ދަރިވަރުން ވާދަ ކުރި އެވެ.