ބޭންކް އޮފް މޯލްޑިވްސް (ބީއެމްއެލް) ގެ އިންޓަނެޓް ބޭންކިންގެ ކަސްޓަމަރުންނަށް ސްޕޭމް އީމެއިލްތަކެއް ފޮނުވަމުން ދާތީ އެކަމާ މެދު ސަމާލުވުމަށް ދިވެހި ބޭންކުން އިލްތިމާސް ކޮށްފި އެވެ.
ބީއެމްްއެލް އިން ބުނީ ކަސްޓަމަރުގެ އިންޓަނެޓް ބޭންކިން އެކައުންޓް ވެރިފައި ކުރުމަށް ކަމަށް ބުނެ ބޭންކުގެ ނަމުގައި އެކި މީހުންނަށް އީމެއިލް ފޮނުވަމުން ދަނީ cut.pi@veloxmail.com.br މި އީމެއިލް އެޑްރެސް އިން ކަމަށެވެ.
މި އީމެއިލް އެޑްރެސް އިން ފޮނުވާ އެއްވެސް އީމެއިލް އަކީ ބީއެމްއެލް އާ ގުޅުން ހުރި އެއްޗެއް ނޫން ކަމަށް ވެސް ބޭންކުން ބުންޏެވެ.
އެހެންވެ މިފަދަ އީމެއިލްތަކަށް ޖަވާބު ނުދިނުމަށް އެންމެހާ ކަސްޓަމަރުންގެ ކިބައިން އެދޭ ކަމަށް ބޭންކުން ނެރުނު ބަޔާނެއްގައިވެ އެވެ.
ފޭކް އީމެއިލްތަކާ ގުޅިގެން ބޭންކުން ވަނީ އިންޓަނެޓް ބޭންކިން ބޭނުން ކުރާ މީހުން ތިން ކަމަކަށް ސަމާލުވުމަށް އަންގާފަ އެވެ. އެގޮތުން އީމެއިލް ނުވަތަ ޓެކްސް މެސެޖަކުން ލިބޭ އެއްވެސް ލިންކެއް ބޭނުން ކޮށްގެން ބީއެމްއެލްގެ ވެބްސައިޓަށް ނުވަނުމަށާއި ބްރައުޒާ މެދުވެރިކޮށް ސީދާ ބޭންކުގެ ވެބްސައިޓަށް ވަނުމަށް އިލްތިމާސް ކޮށްފައިވެ އެވެ.
އަދި އެކައުންޓާއި ކާޑުގެ މައުލޫމާތު އަދި އެއްވެސް އެކްސެސް ކޯޑެއް އެއްވެސް ފަރާތަކަށް އީމެއިލް މެދުވެރިކޮށް ހިއްސާ ނުކުރުމަށް ވެސް އެދިފައިވެ އެވެ.
ބީއެމްއެލް އިން ބުނީ އެފަދަ އެއްވެސް މައުލޫމާތެއް ހޯދުމަށް ބީއެމްއެލް އިން ކަސްޓަމަރުގެ ކިބައިން ނޭދޭނެ ކަމަށެވެ. އަދި އެއްވެސް އެކްސެސް ކޯޑެއް އީމެއިލް މެދުވެރިކޮށް ބޭނުންކުން ނުފޮނުވާނެ ކަމަށް ވެސް ބުނެފައިވެ އެވެ. އަދި ބޭންކް އެކައުންޓާއި ބޭންކް ކާޑާ ގުޅުން ހުރި މައުލޫމާތުތައް ރައްކާތެރި ކަމާ އެކު ބެލެހެއްޓުމަށް ވެސް ބޭންކުން ވަނީ ކަސްޓަމަރުންނަށް ހަނދާންކޮށް ދީފަ އެވެ.