ފީފާ ވޯލްޑް ކަޕް 2018ގެ ގްރޫޕް ޑީގައި މިއަދު ކުޅުނު މެޗްގައި އިނގިރޭސިވިލާތުން ޕެނަމާ ކޮޅަށް ލަނޑު ގޯންޏެއް އޮއްސާލައިފި އެވެ.
ފީފާ ވޯލްޑްކަޕެއްގައި އަލަށް ވާދަކުރި ޕެނަމާގެ މައްޗަށް އިނގިރޭސިވިލާތުން ކުރި ހޯދީ 1-6 އިންނެވެ.
މިއަދުގެ މެޗްގެ ފުރަތަމަ ހާފުގައި އިނގިރޭސިވިލާތުން 5 ލަނޑު ޖެހިއެވެ. އެ ލަނޑުތައް ކާމިޔާބު ކޮށްދިނީ ހެރީ ކޭން އާއި ޖޯން ސްޓޯންސް އަދި ލިންގާޑެވެ.
ކޭންގެ އާއި ސްޓޯންސް ކޮންމެ ކުޅުންތެރިޔަކު ދެލަނޑު ކާމިޔާބު ކުރިއިރު ކޭންގެ ދެ ލަނޑު ވެސް ކާމިޔާބު ކުރީ ޕެނަލްޓީންނެވެ.
ފުރަތަމަ ހާފު ނިމުނީ 0-5 އިން އިނގިރޭސިވިލާތް ކުރީގައި އޮވެގެންނެވެ.
ދެވަނަ ހާފު ފަށައިގެން ޕެނަމާ އިން އެ ޓީމުގެ ކުޅުން ރަނގަޅު ކުރިއެވެ. މިހާފުގައި އިނގިރޭސިވިލާތަށް ކާމިޔާބުކުރެވުނީ އެންމެ ލަނޑެކެވެ.
އެ ލަނޑު ކާމިޔާބުކޮށް ހެރީ ކޭން ހެޓްރިކް ހެދި އިރު އޭނާ ވެގެން ގޮސްފައިވަނީ ވޯލްޑްކަޕެއްގައި ހެޓްރިކް ހެދި އިނގިރޭސިވިލާތަށް ނިސްބަތްވާ ދެވަނަ ކުޅުންތެރިޔާ އަށެވެ.
ޕެނަމާގެ ފަރާތުން ދަށް ކުޅުމެއް ފެނުނު މިމެޗްގައި އެޓީމުގެ ހަމައެކަނި ލަނޑު މެޗްގެ 78 ވަނަ މިނިޓްގައި ކާމިޔާބުކޮށްދިނީ ފެލިއްޕޭ ބަލޯއީ އެވެ.
މެޗް ނިމުނީ 1-6 އިން އިނގިރޭސިވިލާތް މޮޅުވެގެންނެވެ.
މި މެޗުން މޮޅުވުމުން އިނގިރޭސިވިލާތަށް ވަނީ 6 ޕޮއިންޓާއި އެކު ގްރޫޕްގެ 1 ވަނަ ލިބިފައެވެ. ގްރޫޕްގެ ފަހު މެޗްގައި އެޓީމުން ނިކުންނާނީ ބެލްޖިއަމާއި ދެކޮޅަށެވެ.