ފީފާ ވޯލްޑްކަޕް ގްރޫޕް އެޗްގައި ސެނަގާލް އާއި ޖަޕާން ބައްދަލުކުރި މެޗް 1-1 އިން އެއްވަރު ވެއްޖެއެވެ.
އެކްތަރިންބާގް އެރީނާގައި ކުޅުނު މިމެޗްގައި ފުރަތަމަ ލަނޑު ކާމިޔާބުކޮށް ލީޑު ނެގީ ސެނެގާލް އިންނެވެ. މި ލަނޑު މެޗްގެ 11 ވަނަ މިނިޓްގައި ކާމިޔާބުކޮށްދިނީ ސާޑިއޯ މާނޭއެވެ.
ޖަޕާނަށް އެއްވަރުކޮށްދިނީ މެޗްގެ 34 ވަނަ މިނިޓްގައި ޓަކާޝީ އިނޫއީ އެވެ.
ފުރަތަމަ ހާފް 1-1 ގެ ނަތީޖާއަކުން ނިމުނު އިރު ދެވަނަ ހާފުގައި ޖަޕާނުން ވަނީ ގިނަ ފުރުސަތުތަކެއް ތަނަވަސްކޮށްފައެވެ.
އެގޮތުން މެޗްގެ 63 ވަނަ މިނިޓްގައި އެޓީމުގެ އިނޫއީ އަށް ލިބުނު ފުރުސަތު ފާހަގަކޮށްލެވެއެވެ. ސެނެގާލް ޕެނަލްޓީ އޭރިޔާ ތެރޭގައި ހުރެފައި އިނޫއީ ފޮނުވާލި ބޯޅައިގެ ހުރަހަކަށް ވީ ގޯލުގެ ދަނޑިއެވެ.
ސެނެގާލްއަށް ދެވަނަ ފަހަރަށް މެޗްގައި ލީޑު ނަގައިދިނީ 71 ވަނަ މިނިޓްގައި މައުސާ ވެގް އެވެ.
މި ގޯލަށް ފަހު ޖަޕާނުގެ ފަރާތުން ވަރަށް ބޮޑަށް ކުރިއަށް ޖެހި ސެނެގާލްގެ ގޯލަށް ނުރައްކާ ކުރަން ފެށިއެވެ. އޭގެ ނަތީޖާއެއްގެ ގޮތުން މެޗްގެ 78 ވަނަ މިނިޓްގައި ކެސޫކީ ހޮންޑާ ވަނީ ޖަޕާނަށް އެއްވަރުކޮށްދީފައެވެ.
މި ނަތީޖާ އާއި އެކު ގްރޫޕް އެޗްގެ ޕޮއިންޓް ޓޭބަލަށް ބަލާއިރު ޖަޕާނާއި ސެނެގާލް އަށް ވެސް ވަނީ 4 ޕޮއިންޓް ލިބިފައެވެ. ޕޮއިންޓްގެ ގޮތުން އަދި ގޯލުގެ ތަފާތުން ވެސް މި ދެޓީމު ވަނީ ހަމަހަމަ ވެފައެވެ.
ގްރޫޕް އެޗްގައި ޖަޕާނާއި ސެނެގާލް އަށް ވުރެ އެއް މެޗް މަދުން ކުޅެފައިވާ ކޮލަމްބިއާ އަދި ޕޮލެންޑަށް އަދި ޕޮއިންޓެއް ލިބިފައެއް ނުވެއެވެ.