ފީފާ ވޯލްޑްކަޕްގައި ގްރޫޕް އެޗް ގައި ރޭ ކުޅުނު ދެވަނަ މެޗުގައި ޕޮލެންޑް ބަލިކޮށް ކޮލަމްބިއާ އުއްމީދު އާކޮށްފިއެވެ. މިމެޗު ކޮލަމްބިއާ އިން ކާމިޔާބުކުރީ 3-0 އިން އެވެ.
މިމެޗުގައި ކޮލަމްބިއާ އިން ކާމިޔާބުކުރި ފުރަތަމަލަނޑު 40 ވަނަ މިނެޓުގައި ޖަހައިދިނީ ބާސެލޯނާ އަށް ކުޅޭ ޑިފެންޑަރު ޔެރީ މީނާ އެވެ. ފުރަތަމަހާފު ނިމިގެންދިޔައީ 1-0 އިން ކޮލަމްބިއާ ކުރީގައޮވެގެންނެވެ.
ކޮލަމްބިއާ ގެ ދެވަނަ ލަނޑު 70 ވަނަ މިނެޓުގައި ކާމިޔާބުކޮށްދިނީ ކެޕްޓަން ރަޑަމެލް ފަލްކާއޯ އެވެ. މިއީ ވޯލްޑްކަޕެއްގައި އޭނާ ޖެހި ފުރަތަމަ ގޯލެވެ.
އޭގެ ފަސްމިނެޓުފަހުން ކޮލަމްބިއާގެ ތިންވަނަ ލަނޑު ޖަހައިދީ މެޗުން ތިން ޕޮއިންޓް ޔަޤީންކޮށްދިނީ އިޓަލީގެ ޔުވެންޓަސް އަށް ކުޅޭ ހުއާން ކުއާޑްރާޑޯއެވެ. އޭނާ މިލަނޑު ޖަހައިދިނީ ހަމޭސް ރޮޑްރިގޭޒް ދިން ވަރަށް ރީތި ބޯޅައަކުންނެވެ.
މިމެޗުގެ ފަހު ވަގުތުކޮޅުގައި ޕޮލެންޑަށް ލަނޑު ޖަހާނެ ފުރުޞަތުތަކެއް ލިބިގެންދިޔައިރު އޭގެ ހުރަހަކަށްވީ ކޮަލަމްބިއާގެ ގޯލްކީޕަރު ޑޭވިޑް އޮސްޕީނާ އެވެ.
ގްރޫޕް އެޗް ގެ އެންމެ ކުރީގައި އުޅޭ ދެޓީމުކަމަށްވާ ޖަޕާނާއި ސެނެގާލަށް ހަތަރު ޕޮއިންޓް ލިބިފައިވާއިރު، ލަނޑުގެ ގޮތުން ވެސް އެއްވަރުވެފައިވާއިރު ފެއާޕްލޭ ޕޮއިންޓުން ކުރި ހޯދައިގެން މި ވަގުތު އެއް ވަނައިގައި އޮތީ ޖަޕާނެވެ. ތިންވަނައިގައި އޮތް ކޮލަމްބިއާ އަށް ލިބިފައިވަނީ ތިން ޕޮއިންޓެވެ. އެންމެ ފުލުގައި އޮތް ޕޮލެންޑަށް އަދި ޕޮއިންޓެއް ލިބިފައިނުވާއިރު، އެ ޓީމު ވަނީ ކަޓާފައެވެ.
މި ގްރޫޕްގެ ފަހު މެޗުތަކުގައި އަންނަ ބުރާސްފަތި ދުވަހު ކޮލަމްބިއާ ނުކުންނާނީ ސެނެގާލާ ދެކޮޅަށެވެ. އަދި ޕޮލެންޑް ބައްދަލުކުރާނީ ޖަޕާން އާއި އެވެ.