ރައީސް އަބްދުﷲ ޔާމީނާއި މާރާމާރީ ހިންގާނެ ކަމަށް ބުނެ ޓްވިޓަރގައި އިންޒާރު ދިން އެކައުންޓް އޮޕަރޭޓްކުރަނީ އޭނާ ކަމަށް ސޯޝަލް މީޑިއާ އެކްޓިވިސްޓް މޫސާ އަންވަރު ބުނެފިއެވެ.
މޫސާ އަންވަރު މިހެން ބުނެފައިވަނީ، ރައީސް ޔާމީނާއި މާރާމާރީ ހިންގާނެކަމުގެ އިންޒާރު ދީ ޓްވީޓް ކޮށްފައިވާ ކަމަށް ބުނެ ޕީއެސްއެމްގައި ލިޔެފައިވާ ޚަބަރާއި އެކު ކުރި ޓްވީޓެއްގައެވެ.
Thee aharen operate kuraa ID eh. Dhen lalalaa @mshainee @PoliceMv https://t.co/4T9CHiCg2a
— ?? ????? ????? ?? Moosa Anvar (@moosaanvar) June 25, 2018
"ތީ އަހަރެން އޮޕަރޭޓްކުރާ އައިޑީއެއް. ދެން ލަލަލާ" ފިޝަރީޒް މިނިސްޓަރ ޝައިނީގެ ޓްވިޓަރ އާއި ފުލުހުންގެ ރަސްމީ ޓްވިޓަރ އެކައުންޓް ޓެގްކޮށް މޫސަ ޓްވީޓްކޮށްފައިވެއެވެ.
ޕީއެސްއެމް އިން ގެނެސްދިން ޚަބަރުގައި ރައީސް ޔާމީނަށް އިންޒާރު ދީފައިވާ ކަމަށް ބުނެފައި ވިޔަސް ޓްވީޓްގައި ލިޔެފައިވަނީ ރައީސް ޔާމީން ކަމެއް ނުވަތަ އެހެން ޔާމީނެއް ކަމެއް ސާފެއް ނުވެއެވެ.
ޔާމީން ކިޔާ މީހަކާއި މާރާމާރީ ހިންގާނެ ކަމަށް ބުނެ އިންޒާރު ދީފައި ވަނީ ޖުމްހޫރީ ޕާޓީގެ ކުރީގެ ލޯގޯ ޕްރޮފައިލް ފޮޓޯއަށް ބޭނުންކުރާ ޓްވިޓަރ އެކައުންޓަކުންނެވެ.
އެ އެކައުންޓުން ކުރި ޓްވީޓްގައި "ޔާމީން" ކިޔާ މީހަކަށް އިންޒާރު ދީ ބުނެފައިވަނީ ބައެއް ސިޔާސީ ފަރާތްތައް މިނިވަން ނުކޮށް ގޭގެ ދޮރުގައި "ޓަކި" ނުޖެހުމަށެވެ. އަދި އެގޮތަށް ކަންތައްކޮށްފިނަމަ "ކަލޭގެ ބޮލުގައި ފޫދާވަރަށް މަގޭ ޓަކި ޖަހާނަން" ކަމަށް ބުނެފައިވެއެވެ.
ކުރިން ނޫސްވެރިއެއްގެ ގޮތުގައި ވެސް މަސައްކަތް ކުރި މޫސާ އަންވަރު ސިޔާސީ ދާއިރާއިން އެންމެ ފުރަތަމަ ފެނުނީ އެމްޑީޕީގެ އެކްޓިވިސްޓެއްގެ ގޮތުގަ އެވެ.
އޭގެ ފަހުން އޭނާ ވަނީ 2008 ވަނަ އަހަރުގެ ތެރޭގައި އެމްޑީޕީގެ ކެންޑިޑޭޓް މުހައްމަދު ނަޝީދުގެ ކެންޑިޑޭސީ ބާތިލް ކަމަށް ކަނޑައަޅައި ދިނުމަށް އެދި ސުޕްރީމް ކޯޓަށް މައްސަލަ އެއް ވެސް ހުށަހަޅާފައެވެ.
އަދި ޖުމްހޫރީ ޕާޓީގެ ކައުންސިލް މެމްބަރެއްގެ ގޮތުގައި ހުރުމަށް ފަހު، ކުރީގެ ނައިބު ރައީސް އަދީބުގެ އަރިސް މީހެއްގެ ގޮތުގައި ފަހުން ޕީޕީއެމަށް ވަނީ ބަދަލުވެފަ އެވެ.
އަދީބު ހައްޔަރުކުރެވުނު ހިސާބުން ފެށިގެން މޫސަ ދިރިއުޅެމުން ދަނީ އިނގިރޭސިވިލާތުގައެވެ. އޭނާއަށް އެގައުމުން ހިމާޔަތްދީ ސިޔާސީ ރެފިއުޖީއެއްގެ ގޮތުގައި ވަނީ ބަލައިގެންފައެވެ.