ޕޯޗުގަލްގެ ޓީމު ތިބޭ ހޮޓަލުގެ ބޭރަށް އިރާނުގެ ސަޕޯޓަރުންތަކެއް އެއްވެ އަޑުގަދަކޮށް ޕޯޗުގަލްގެ ތަރި ރޮނާލްޑޯ އާއި އެޓީމުގެ ބައެއް ކުޅުންތެރިން ނިދިން ހޭލައްވާލައިފިއެވެ.
މަޝްހޫރު ކުޅިވަރު ވެބްސައިޓް "ގޯލް ޑޮޓްކޮމް" ގައި ބުނެފައިވާ ގޮތުގައި އިރާނުގެ ސަޕޯޓަރުންތަކެއް ވަނީ ދަންވަރު ގަޑީގައި ޕޯޗުގަލް ޓީމު ތިބޭ ހޮޓަލުގެ ބޭރުގައި ލަވަކިޔައި ވުވުޒެލާ ވެސް ފުމެފައެވެ.
އިރާނުގެ ސަޕޯޓަރުން މިގޮތަށް ކަންތައް ކޮށްފައި ވަނީ ޕޯޗުގަލްގެ ޓީމަށް އުނދަގޫ ކޮށް އެޓީމުގެ ތައްޔާރީތަކަށް ހުރަސްއެޅުމަށް ކަމަށް ވެއެވެ.
ސޯޝަލް މީޑިޔާގައި ދައުރުވާ ވީޑިއޯ އަކުން ފެންނަ ގޮތުގައި އިރާނުގެ ސަޕޯޓަރުން އަޑުގަދަ ކުރަން ފެށުމުން ރޮނާލްޑޯ ވަނީ ހޮޓަލުގެ ކުޑަދޮރެއް ކައިރިއަށް އައިސް އޭނާ ނިދަނީ ކަމަށާއި އަޑުގަދަ ނުކުރުމަށް އަތުގެ އިޝާރާތުން ބުނެފައެވެ.
އިރާނާއި ޕޯޗުގަލް ބައްދަލުކުރާ މެޗް މިރޭ 11 ޖަހާއިރު ފަށާނެއެވެ. ދެވަނަ ބުރުގެ ޖާގައެއް ހޯދުމަށް އެމެޗުން މޮޅުވުން ދެޓީމަށް ވެސް މުހިއްމެވެ.