ފީފާ ވޯލްޑްކަޕް 2018ގެ ގްރޫޕް ބީ ގެ އެއްވަނަ ޓީމުގެ ގޮތުގައި ސްޕެއިން އިން މުބާރާތުގެ ދެވަނަ ބުރުގެ ޖާގައެއް ހޯދައިފިއެވެ. ސްޕެއިން އިން ދެވަނަ ބުރުގެ ޖާގައެއް ހޯދީ 5 ޕޮއިންޓާއި އެކު ގްރޫޕްގެ 1 ވަނަ ހޯދައިގެންނެވެ. ޕޯޗުގަލް އަށް ވެސް ހަމަ މިއަދަދަށް ޕޮއިންޓް ލިބިފައިވާއިރު ސްޕެއިން އަށް ކުރި ލިބެނީ ގޯލުގެ ތަފާތުންނެވެ.
މިރޭ މޮރޮކޯ އާއި ސްޕެއިން ކުޅުނު މެޗުން ނިމުނީ 2-2 އިން އެއްވަރުވެގެންނެވެ.
މިމެޗްގެ ކުރިން ގިނަ ބަޔަކު ހީކުރިގޮތާއި ހިލާފަށް ފުރަތަމަ ލަނޑުޖަހައި ލީޑް ނެގީ މޮރޮކޯ އެވެ. އެ ލަނޑު މެޗްގެ 14 ވަނަ މިނެޓުގައި ކާމިޔާބުކޮށް ދިނީ ޚާލިދު ބޫތަލިބް އެވެ.
މިއީ ސްޕެއިނުގެ މެދުތެރެއިން އަންދްރެއަސް އިނިއެސްޓާ އަތުން ގެއްލުނު ބޯޅައެއްގެ ފައިދާނަގައި މޮރޮކޯ އިން ކާމިޔާބުކުރި ގޯލެކެވެ.
މޮރޮކޯ އިން ލަނޑުޖެހިތާ މާގިނައިރުތަކެއް ނުވަނީސް ސްޕެއިނަށް އެއްވަރު ކޮށްދިނީ އިނިއެސްޓާ ތަނަވަސްކޮށްދިން ފުރުސަތަކުން އިސްކޯ އެވެ.
އިނިއެސްޓާ ދިން ބޯޅަ ޕެނަލްޓީ އޭރިއާތެރޭގައި ހުރެ އިސްކޯ ގޯލްގެ މަތީކަނަށް އަމާޒުކޮށްލީ ވަރަށް ހަމަޖެހިލައިގެން ހުރެއެވެ.
މި ލަނޑަށް ފަހު ވެސް ސްޕެއިން އިން އިތުރު ލަނޑެއް ޖެހޭތޯ މަސައްކަތް ކުރި ނަމަވެސް މިހާފު ނިމުނީ 1-1- އިން ދެޓީމް އެއްވަރު ވެގެންނެވެ.
މޮރޮކޯ އިން މިމެޗުގައި ދެވަނަ ފަހަރަށް ލީޑް ނެގީ 81 ވަނަ މިނިޓްގައި ނަސީރީ ޖަހައިދިން ލަނޑަކުންނެވެ. ސްޕެއިން އަށް ދެވަނަ ފަހަރަށް ނަތީޖާ ހަމަހަމަކޮށްދިނީ އިތުރު ވަގުތުގައި އިއާގޯ އަސްޕާސް އެވެ.
މުބާރާތުގެ ދެވަނަ ބުރުގައި ސްޕެއިން އާއި ބައްދަލުކުރާނީ ގްރޫޕް އޭގެ ދެވަނަ ހޯދި ރަޝިޔާއެވެ.