ކަލިނިންގްރާޑް، ރަޝިޔާ: ވޯލްޑްކަޕް ގެ ގްރޫޕް ޖީ ގައި އިންގްލެންޑާއި ދެކޮޅަށް ކުޅުނު މެޗުގައި އަދުނާން ޖަނުޒާއީ ކާމިޔާބުކުރި ލަނޑުން ބެލްޖިއަމް ވަނީ ސަތޭކަ ޕަސެންޓްގެ ރެކޯޑާއިއެކު ގްރޫޕްގެ އެއްވަނައިގެ ގޮތުގައި ދެވަނަ ބުރަށް ދަތުރުކޮށްފައެވެ.
މިގްރޫޕުގެ އެއްވަނަ ހޯދި ބެލްޖިއަމް ދެވަނަ ބުރުގައި ގްރޫޕް އެޗް ގެ ދެވަނަ އަށް ދިޔަ ޖަޕާން އާއި ބައްދަލުކުރާއިރު ދެވަނައަށް ދިޔަ އިންގްލެންޑް ނިކުންނާނީ ގްރޫޕް އެޗް ގެ އެންމެ ކުރީގައި އޮވެ ނިންމާލި ކޮލަމްބިއާ އާ އެވެ.
އިންގްލެންޑް އަދި ބެލްޖިއަމް މިމެޗަށް ނިކުތްއިރު ދެޓީމު ވެސް ދެވަނަ ބުރަށް ދަތުރުކޮށްފައިވުމުން ނިކުތީ ގިނަ ބަދަލުތަކަކާއިއެކުގައެވެ. އެގޮތުން ބެލްޖިއަމް އެންމެފަހުން ކުޅުނު މެޗުގެ ފުރަތަމަ އެގާރައިގައި ހިމެނުނު 9 ކުޅުންތެރިންނާއި ނުލައި ނިކުތްއިރު އިންގްލެންޑް ގެ ފުރަތަމަ އެގާރައިގައި ހިމަނާފައިވަނީ އާއްމުކޮށް އެޓީމުގެ ފުރަތަމަ އެގާރައިގައި ކުޅޭ އެންމެ ތިން ކުޅުންތެރިންނެވެ.
މިމެޗުގެ ފުރަތަމަހާފުގައި ފެނިގެންދިޔަ އެންމެ ނުރައްކާތެެރި ހަމަލާ ފޮނުވާލާފައިވަނީ ހަ ވަނަ މިނެޓުގައި ބެލްޖިއަމް ގެ ޔޫރީ ޓީލަމެންސް އެވެ. ޕެނަލްޓީ އޭރިޔާ ބޭރުގައި ހުރެ އޭނާ ފޮނުވާލި ބޯޅަ އިންގްލެންޑް ގެ ކީޕަރު ޖޯޑަން ޕިކްފޯޑް ވަނީ މަތަކޮށްފައެވެ.
އޭގެ ހަތަރު މިނެޓުފަހުން ބެލްޖިއަމްގެ މިޝީ ބަޓްޝުއާޔީ އަށް ވަނީ ލަނޑު ޖަހާނެ ވަރަށް ރަނގަޅު ފުރުޞަތެއް ލިބި ބޭނުންހިފޭގޮތްނުވެފައެވެ. އޭނާ ފޮނުވާލި ބޯޅަ ގޯލްގެ ރޮނގު މަތިން ސަލާމަތްކުރީ އިންގްލެންޑް ގެ ޑިފެންޑަރު ގެރީ ކާހިލް އެވެ.
މީގެއިތުރުން ފުރަތަމަހާފުގައި މަރުއާން ފެލައިނީ ފޮނުވާލި ހަމަލާ ވަނީ އިންގްލެންޑް ގެ ޑިފެންޑަރުން ދިފާއުކޮށްފަައެވެ.
މިމެޗުގެ ފުރަތަމަހާފު ނިމުނީ 0-0 އިން ދެޓީމު އެއްވަރުވެގެންނެވެ.
ދެވަނަހާފު ފެށިގެން ހަވަނަ މިނެޓުގައި ބެލްޖިއަމްގެ އަދުނާން ޖަނުޒާއި ވަނީ އެޓީމަށް ލީޑް ނަގައިދީފައެވެ. ޕެނަލްޓީ އޭރިޔާ ތެރެއަށް ވަދެ އިންގްލެންޑް ގެ ޑެނީ ރޯސް ކައިރިން ނައްޓާލުމަށްފަހު ވަނީ ގޯލްގެ މަތީކަނަށް އަމާޒުކޮށްލާފައެވެ.
ބެލްޖިއަމްގެ ލަނޑަށްފަހު އިންގްލެންޑުން ލަނޑެއްޖެހޭތޯ ކުރި މަސައްކަތުން މިމެޗުގައި އެޓީމަށް ލިބުނު އެންމެ ރަނގަޅު ފުރުޞަތު 66 ވަނަ މިނެޓުގައި މާކަސް ރަޝްފޯޑު ފޮނުވާލުމުން ދިޔައީ ބެލްޖިއަމްގެ ގޯލްކީޕަރު ތިބޯ ކޯޓުއާ ގެ އަތުގައި ޖެހިފައި ބޭރަށެވެ.
މެޗު ނިމެން އެންމެ މިނެޓަކަށްވެފައިވަނިކޮށް ބެލްޖިއަމް ގެ ލީޑް ފުޅާކުރުމަށް ޑްރީސް މާޓެންސް އަށް ލިބުނު ބޯޅަ އޭނާ ފޮނުވާލުމުން އިންގްލެންޑް ގެ ކީޕަރު ޕިކްފޯޑް ވަނީ މަތަކޮށްފައެވެ.
މީގެއިތުރުން ދެވަނަހާފުގެ އިތުރުވަގުތުގައި މަރުއާން ފެލައިނީ އަށް ވަނީ ލަނޑު ޖަހާނެ ރަނގަޅު ފުރުޞަތެއް ލިބިފައެވެ. އެހެންނަމަވެސް އޭނާ ފޮނުވާލި ބޯޅަ ގޯލަށް އަމާޒުވާގޮތެއް ނުވިއެވެ.
ގްރޫޕް ޖީ ގެ މެޗުތައް ނިންމާލިއިރު އެއްވަނަ ހޯދި ބެލްޖިއަމް އަށް ތިން މެޗުން 9 ޕޮއިންޓް ލިބިފައިވާއިރު ދެވަނައަށްދިޔަ އިންގްލެންޑަށް ލިބުނީ 6 ޕޮއިންޓެވެ. ޓިއުނީޝިޔާ އަށް ތިންވަނަ ލިބެނީ ޖުމްލަ 3 ޕޮއިންޓް ހޯދައިގެންނެވެ. ޕެނަމާ އަށް އެއްވެސް ޕޮއިންޓެއް ލިބިފައިނުވާއިރު އެޓީމު އޮތީ އެންމެ ފުލުގައެވެ.