ސަރަންސްކް، ރަޝިޔާ: ވޯލްޑްކަޕްގެ ގްރޫޕް ޖީ ގައި ޕެނަމާ އާއި ދެކޮޅަށްކުޅެ ދެވަނަހާފުގައި ކާމިޔާބުކުރި ދެލަނޑުގެ އެހީގައި މޮޅަކުން ޓިއުނީޝިޔާ ނިންމާލައިފިއެވެ.
ޓިއުނީޝިޔާ އިން މިމެޗުގެ ފުރަތަމަ ހާފުގައި ގިނަ ވަގުތު ބޯޅަ ގެންގުޅެ ގިނަ ހަމަލާތަކެއް އުފައްދާފައިވީނަމަވެސް މިހާފުގައި ފެނިގެންދިޔަ ހަމައެކަނި ލަނޑު ޕެނަމާއިން ކާމިޔާބުކޮށްފައިވާއިރު އެއީ ޓިއުނީޝިޔާގެ ޔަސީން މެރިއާ އަތުން ބައިކޮޅަށްވަން ގޯލެކެވެ.
މިމެޗުގެ ފުރަތަމަހާފު ނިމިގެންގޮސްފައިވަނީ 1-0 އިން ޕެނަމާ ކުރީގައޮވެގެންނެވެ.
އެހެންނަމަވެސް، ދެވަނަހާފު ފެށިގެން ކުޑައިރުކޮޅެއްގެތެރޭގައި ޓިއުނީޝިޔާ އިން ވަނީ ނަތީޖާ ހަމަހަމަކޮށްފައެވެ. މިލަނޑު އެޓީމަށް ޖަހައިދިނީ ފަޚްރުއްދީން ބިން ޔޫސުފް އެވެ.
މިމެޗުގައި ޓިއުނީޝިޔާއިން ފުރަތަމަ ފަހަރަށް ލީޑް ނެގީ 66 ވަނަ މިނެޓުގައި ކެޕްޓަން ވަހްބީ ކަޒްރީ ޖަހައިދިން ލަނޑަކުންނެވެ. މިއީ މިފަހަރުގެ ވޯލްޑްކަޕްގައި އޭނާ ކާމިޔާބުކުރި ދެވަނަ ލަނޑެވެ.
މިމެޗުން ހޯދީ ތިން ޕޮއިންޓާއިއެކު ޓިއުނީޝިޔާ ވަނީ މިގްރޫޕުގެ ތިންވަނައަށް ޖެހިލާފައެވެ. މިފަހަރުގެ މުބާރާތުގައި މުޅިން އަލަށް ވާދަކުރި ޕެނަމާ ނިންމާލީ ގްރޫޕުގެ އެންމެ ފުލުގައި އޮވެގެންނެވެ.
މިގްރޫޕުން ދެވަނަބުރަށް ދަތުރުކުރީ އެއްވަނަ ހޯދީ ބެލްޖިއަމް އާއި ދެވަނައިގައި އޮވެ ނިންމާލި އިންގްލެންޑެވެ.