ސ. ހިތަދޫ ރީޖަނަލް ހޮސްޕިޓަލް (އެޗްއާރްއެޗް) އަށް އަަލަށް ގެނައި އަންހެނުންގެ ހާއްސަ ޑޮކްޓަރަކީ މީގެ ކުރިން ހިތަދޫގައި ހިންގާ ޕްރައިވެޓް ހޮސްޕިޓަލް އައިއެމްޑީސީގައި މަަަސައްކަތް ކުރަމުން ދަނިކޮށް، ކަމުނުގޮސްގެން އެތަނުން ފޮނުވާލި ޑޮކްޓަރެއް ކަމަށް ވަަރަށް އިތުބާރު ހުރި ގޮތަކަށް "އައްޑޫ ލައިވް" އަށް އެނގިއްޖެ އެވެ.
މިކަމާ ބެހޭ ގޮތުން "އައްޑޫ ލައިވް" އާ ވާހަކަ ދެއްކި މީހަކު މިއަދު ބުނީ އިންޑިއާ އަށް ނިސްބަތްވާ އުމުރުން 60 އަށް ވުރެ މައްޗަށް ގޮސްފައިވާ ފިރިހެން އެ ޑޮކްޓަރަކީ އައިއެމްޑީސީ އަށް ގެނައުމަށް ފަހު، ކަމު ނުގޮސްގެން 10 ވަރަކަށް ދުވަހުގެ ތެރޭގައި ފޮނުވާލި ޑޮކްޓަރެެއް ކަމަށެވެ.
"އެތަނުން ފޮނުވާލީމަ ކޮންމެވެސް އެހެން އަތޮޅެއްގައި އެ ޑޮކްޓަރު މަސައްކަތް ކުރަމުން ދިޔައީ. އެކަން އައިއެމްޑީީސީގައި މަސައްކަތް ކުރާ ބައެއް މުވައްޒަފުންގެ ފަރާތުން ވެސް އެނގިފައިވޭ،" އޭނާ ބުންޏެެވެ. "އެހެންވެ އަޅުގަނޑުމެން ކަންބޮޑު ވަނީ ކަމުނުގޮސްގެން ފޮނުވާލި ޑޮކްޓަރަކު އަނެއްކާ އައްޑު އަށް ގެންނާތީ. އެ މައްސަލަ ނޫންތޯ މީގެ ކުރިން ވެސް ދިމާވަމުން އައީ. އަނެއްކާ އަންހެނުންގެ ހާއްސަ ޑޮކްޓަރަކަށް ފިރިހެން ޑޮކްޓަރަކު ގެނައުމަކީ ވެސް އެހާ ހިތްހަމަޖެހޭ ކަމެއް ނޫން."
މިކަމާ ބެހޭ ގޮތުން ހޮސްޕިޓަލްގެ އޮފިޝަަލަކު މިއަދު ވިދާޅުވީ ހޮސްޕިޓަލަށް އަލަށް ގެނައި ޑޮކްޓަރަކީ މީގެ ކުރިން ތ. އަތޮޅުގައި އަހަރެއް ވަންދެން މަސަައްކަތް ކުރި ޑޮކްޓަރެއް ކަަމަށެވެ.
"އެކަމަކު އޭނާ އައިއެމްޑީސީގައި މަސައްކަތް ކުރި ކަމުގެ އެއްވެސް މައުލޫމާތެއް މިހާތަނަށް އަޅުގަނޑުމެންނަށް ލިބިފައެއް ނެތް. އެކަން ބަލާލެވި ދާނެ. ތ. އަތޮޅުގައި އެއް އަހަރު ދުވަހުގެ ކޮންޓްރެކްޓެއް ހަމަވެފައި ވަނިކޮށް މިކޮޅަށް އޭނާ މި ގެނެވުނީ،" އޮފިޝަލް ވިދާޅުވި އެވެ.
އެޗްއާރްއެޗަށް އަލަށް ގެނައި އަންހެނުންގެ ޑޮކްޓަރު ރޭ އައްޑު އަށް އައިސް މިއަދު ހޮސްޕިޓަލަށް ވަނީ ނިކުންނަން ފަށާފަ އެވެ. އެހެން ނަމަވެސް ރަސްމީކޮށް ފަރުވާ ދިނުމުގެ މަސައްކަތް އޭނާ ފަށާނީ މާދަމާ ކަމަށް ހޮސްޕިޓަލުން ބުންޏެވެ.