ކޮންމެ އިންތިޚާބަކާ ދިމާކޮށް އައްޑޫއާއި ގުޅޭގޮތުން ހުރިހާ ސަރުކާރަކުން ވެސް ވައުދުތައް ވެއެވެ. އެ ވައުދުތައް ފުއްދުމަށް އެއްވެސް މަސައްކަތެއް ނުކޮށް އަނެއްކާ ވެސް އާ ވައުދުތަކުގެ ވާހަކަ ފަށަނީ އަނެއް އިންތިޚާބަށް ބޯމަތިވުމުންނެވެ. މިއީ އައްޑޫ ސިޓީގެ ހުރިހާ ރައްޔިތުން ދަންނަ ހަގީގަތަކެވެ. ވަޒީފާގެ ބިރަށް ނުވަތަ ލިބޭ މަންފާއަކަށް ޓަކައި އެކަން ނޭނގޭ ކަމަށް ހަދައިގެން މަދު ބަޔަކު ތިބުމަކީ މުޅިން އެހެން ވާހަކައެކެވެ.
އައްޑޫ ރައްޔިތުން ފަތުރުވެރިކަމުގެ ވަސީލަތްތައް ޤާއިމްކޮށްދިނުމަށް ރައީސް ޔާމީންގެ ސަރުކާރަށް އައްޑޫގެ ވިޔަފާރިވެރިންނާއި އާއްމު ރައްޔިތުން ކިތަންމެ އާދޭހެއް ކުރި ނަމަވެސް، އެމީހުންގެ އުއްމީދުތައް ހާސިލްކޮށްދޭ ތަނެއް ނުފެނެއެވެ. ގެސްޓް ހައުސްގެ ބިޔަ މަޝްރޫޢެއް އިއުލާން ކުރި ނަމަވެސް އެކަމާއި ބެހޭ އެއްވެސް މަސައްކަތެއް ނުފެށެއެވެ. އެ މަޝްރޫޢަށް ވީ ގޮތެއް އެނގޭ މީހަކު ވެސް ނެތީއެވެ.
ރައީސް ޔާމީންގެ ސަރުކާރުގައި މިހާތަނަށް އެންމެ އެނދެއް ވެސް އިތުރެއް ނުވޭ!
ފާއިތުވި ހަތަރު އަހަރުގެ ތެރޭގައި ރައީސް ޔާމީންގެ ސަރުކާރުން އައްޑޫގައި ފަތުރުވެރިކަން ކުރިއެރުވުމަށް ކުރެވުނު މަސައްކަތް ތަކަކީ ހަމައެކަނި ބޭއްވި ރަސްމިއްޔާތު ތަކެކެވެ. އެ ރަސްމިއްޔާތު ތަކުގައި ދެއްކި ވާހަކަތަކެކެވެ. އިންތިޚާބުތަކާއި ދިމާކޮށް މަޝްރޫޢުތައް އިއުލާންކުރި ނަމަވެސް ރައީސް ޔާމީންގެ ވެރިކަމުގެ ދައުރު ނިމިގެން މިދަނީ އައްޑޫގައި ފަތުރުވެރިކަމުގެ އެންމެ އެނދެއް ވެސް އިތުރު ނުކުރެވިއެވެ.
މޮޅެތި ޕްލޭންތަކާއި ކުރެހުންތަކާއި އެކު ރައްޔިތުންގެ ލޯތަކަށް ދައްކާލި ގެސްޓް ހައުސް މަޝްރޫޢު އަކީ 18 މަސް ދުވަހުން އެއްކޮށް ނިންމާނެ ކަމަށް ބުނި މަޝްރޫއެކެވެ. އެ މަޝްރޫޢު އިއުލާންކުރި ފަހުން 14 މަސް ދުވަސް ވީއިރު ވެސް އަދި މަޝްރޫޢު އޮތީ ކަރުދާހުގައެވެ. އެއީ ވެސް ބަންދުކޮށްފައިވާ ސިޓީ އުރައެއްގައެވެ. ވާނުވާއެއް ރައްޔިތުންނަކަށް ނޭނގެއެވެ.
ފަތުރުވެރިިކަމާއި ގުޅޭގޮތުން މިހާރު ކިރިޔާ ވެސް އުއްމީދެއް އޮތީ، މިއަހަރުގެ ފަހުކޮޅު ހުޅުވާނެ ކަމަށް ސަރުކާރުން ބުނާ އިސްމެހެލާ ހެރަ އަށެވެ. އެތަނާއި ބެހޭ ތަފްސީލެއް ރައްޔިތުންނާއި ހަމައަށް ފޯރުކޮށްދީފައި ނުވި ނަމަވެސް ވަރަށް އަވަހަށް އެތަން "ހުޅުވާނެ" ކަމަށް ސަރުކާރުގެ ވެރިން ދަނީ ވިދާޅުވަމުންނެވެ.
ދެން ހުރިީ ސ.ގަމުގައި ހުންނަ ދޫގަސް އެވެ. އެތަން ތަރައްޤީ ކުރުމުގެ މަސައްކަތާއި އެމްޕީއެލް އިން މިވަނީ ދެވަނަ ފަހަރަށް ހަވާލުވެފައެވެ. މިހާރު އެތަން ސާފުކުރުމުގެ މަސައްކަތް ކުރަމުން ގެންދާއިރު، މިއީ މިސަރުކާރުގައި ދޫގަސް ތަރައްޤީ ކުރުމަށް އެމްޕީއެލް އިން އެތަން ސާފުކުރާ ދެވަނަ ފަހަރެވެ.
އައްޑޫގައި ހިންގާ ދެ ރިސޯޓް ކަމުގައިވާ ޝަންގްރިއްލާ އާއި ހެރެތެރެ ފިޔަވައި ދެން ފަތުރުވެރިކަމަށް އިތުރުވި އެނދުތަކަކީ އަމިއްލަ ފަރާތްތަކުން ތަރައްޤީކުރި ގެސްޓް ހައުސްތަކެވެ. އެއީ ވެސް ސަރުކާރުގެ "ހެޔޮފުޅުކަމުން" ކުރެވުނު ކަމެއް ނޫނެވެ.
ފްލައިޓުތަކަށް އެއާޕޯޓު ތައްޔާރެއް ނޫން!
ގަން އެއާޕޯޓަށް ބައިނަލް އަޤްވާމީ ދަތުރުތައް ކުރަން ފެށިތާ 16 މަސް ދުވަސް ވެގެން ދިޔައިރު ވެސް އެއާޕޯޓް ހިންގާ ކުންފުނި، އައްޑޫ އިންޓަނޭޝަނަލް އެއާޕޯޓް(އޭއައިއޭ)ގެ ފަރާތުން އެއާޕޯޓްގެ ތަރައްޤީއަށް މަސައްކަތް ކުރާތަނެއް ނުފެނެއެވެ. އެހެން ނަމަވެސް ދޭތެރެއަކުން މޮޅެތި ޕްލޭންތަކާއި ވާހަކަތައް އޭއައިއޭގެ އިސްވެރިން ދައްކަވައެވެ.
ގަން އެއާޕޯޓް ތަރައްޤީ ކުރުމުގައި އޭއިއޭ ފެއިލްވެފައިވާ ކަމުގެ ހެއްކަކީ ގަން އެއާޕޯޓަށް ބައިނަލް އަޤްވާމީ ދަތުރުތައް ކުރަން ފެށިތާ 16 މަސް ވާއިރު އެ އެއާޕޯޓަށް ދަތުރުކުރާ ސްރީލަންކަންގެ ކަންބޮޑުވުންތައް ހައްލުކުރުމަށް މަސައްކަތް ނުކުރެވުމެވެ.
ވިއްސާރަ ދުވަހެއް ނަމަ ސްރީލަންކަންގެ ފްލައިޓުތަކަށް އަރަން ޕަސެންޖަރުން ދާން ޖެހެނީ ދާން ޖެހެނީ ކުޑަ ނަގައިގެންނެވެ. މަތިންދާ ބޯޓަށް އަރަން ބޭނުންކުރާ ސިޑިތަކަކީ ވެސް ހިޔާ ކުރެވިފައިވާ އެއްޗެއް ނޫނެވެ. އޭއައިއޭގެ ފަރާތުން އެއްބާރުލުމެއް ނުލިބުމުން ސްރީލަންކަންގެ ފްލައިޓަށް ޖެހެނީ ވާރޭ ތުނިކޮށްލާތޯ މަޑުކުރާށެވެ.
ގަން އެއާޕޯޓުގެ އިސްވެރިން ވިދާޅުވާ ގޮތުގައި އެއާޕޯޓު އޮތީ 10 ފްލައިޓް އަޔަސް ޚިދުމަތް ދޭން ތައްޔާރަށެވެ. އެ ވިދާޅުވާ 10 ފްލައިޓް ގަން އެއާޕޯޓަށް އައިސްފި ނަމަ ޚިދުމަތް ދޭނެ ކެޕޭސިޓީއެއް އެއާޕޯޓުގައި ނެތެވެ. އެންމެ ކުޑަމިނުން ވިއްސާރަ ދުވަހެއްގައި އެ ފްލައިޓުތަކުން އަންނަ ޕަސިންޖަރުންނަށް ދޭނެ ކުޑައެއް ވެސް ނެތެވެ.
ސައުތް އެފްރިކާއިން ގަމަށް ދަތުރު ފަށަން ތައްޔާރު ކަމަށް ބުނާއިރު މިހާރު އެއާޕޯޓު ތައްޔާރު ނަމަ އެ ބުނެވެނީ އެ ފްލައިޓުތަކުން އަންނަ ޕަސިންޖަރުން ވެސް ވިއްސާރަ ވެއްޖެ ނަމަ ފްލައިޓުން ފައިބަން ޖެހޭނީ ކުޑަ ހިފައިގެން ކަމަށެވެ.
އެއާލައިނަކުން އެންމެ މުހިއްމުކަން ދޭނެ އެއްކަމަކީ، ގަޑިއަށް ފުރުމެވެ. އަދި ދަތުރުވެރިންގެ ހިތްހަމެޖެހުން ވެސް މެއެވެ. އެހެން ނަމަވެސް ގަން އެއާޕޯޓުގެ އިންތިޒާމްތައް ހުރިގޮތުން އެކަމަށް ހުރަސްތަކެއް އެބަހުއްޓެވެ. އެ ހުރަސްތައް ނައްތާނުލައި އެއާޕޯޓު ތައްޔާރޭ ބުނުމަކީ އޮޅުވާލުމެކެވެ.
އޭއައިއޭގެ ފަރާތުން ގެނައި ހަމައެކަނި ބަދަލު، ފިލާ ޖަހައިގެން ޓާމިނަލް ދެބަޔަކަށް ބަހާލުން!
އޭއައިއޭގެ ފަރާތުން ގަން އެއާޕޯޓާއި ހަވާލުވެ އެއާޕޯޓަށް އެއްވެސް ބަދަލެއް ގެނެސްފައި ނުވާއިރު، ކުރިހާ ވެސް ކަމަކީ އެއާޕޯޓުގެ އެރައިވަލް ޓާމިނަލްގެ ވަކި ހިސާބަކުން ފިލާ ޖަހައިގެން ވަކިކުރުމެވެ. އިންޓަނޭޝަނަލް ފްލައިޓް ޖައްސާ ގަޑިތަކުގައި ޑޮމެސްޓިކް ފްލައިޓުތަކުން އަންނަ މީހުންނަށް ފާޚާނާ ކުރެވޭނެ ގޮތެއް ނޯންނާނެއެވެ.
މީގެ އިތުރުން ވެސް އިންޓަނޭޝަނަލް އެއާޕޯޓެއްގެ ގޮތުގައި އޭއައިއޭ ހިންގާތާ 2 އަހަރު ވާން ކައިރިވެފައި ވާއިރު، އެއާޕޯޓުގެ ޑިޕާޗާ ޓާމިނަލްގައި ކާ އެއްޗެއް ލިބޭނެ ގޮތެއް ވެސް ނެތެވެ. މިކަމާއި ފަތުރުވެރިން ޝަކުވާކުރި ނަމަވެސް އެކަމަށް އޭއައިއޭގެ ފަރާތުން އިޖާބަ ދޭ ތަނެއް ނުފެނެއެވެ.
މީގެ އިތުރުން ކަސްޓަމްސް އާއި އިމިގްރޭޝަންގެ ޚިދުމަތްތައް ގަން އެއާޕޯޓުން އެކާށީގެންވާ ގޮތެއްގައި ލިބެން ނެތުމަކީ ވެސް މިހާރު ގަމަށް ދަތުރު ކުރާ ސްރީލަންކަންގެ ވެސް ކަންބޮޑުވުމެކެވެ.
މިހުރިހާ ކަމެއް މިހެއް ހުއްޓައި ސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުން"އެނދު އިތުރުވަނީ" ކަމަށ އަދި އޭއައިއޭގެ އިސްވެރިން ގަން އެއާޕޯޓު "ތައްޔާރު" ކަމަށް ބުނެ ދައްކާ ވާހަކަ ތަކަކީ ހަގީގަތް އޮޅުވާލުމެވެ. ހަގީގަތަކަކީ ގަމުގެ އެއާޕޯޓް ތަރައްޤީ މަޑުޖެހިފައިވާ ކަމެވެ. އައްޑޫގައި ފަތުރުވެރިކަމުގެ އެނދު އިތުރު ނުވާ ކަމެވެ. އިތުރު ވަނީ ހަމައެކަނި އެނދުތައް ޤާއިމްކުރާނެ ކަމަށް ވާ ވައުދުތަކެވެ.