ފީފާ ވޯލްޑްކަޕް 2018ގެ ދެވަނަ ބުރުގައި މިއަދު މެކްސިކޯ އާއި ދެކޮޅަށް ބްރެޒިލް ނިކުންނަ އިރު އެޓީމުގެ ފުރަތަމަ އެގާރައިގައި މާސެލޯ ނުހިމެނެއެވެ.
ގްރޫޕް ސްޓޭޖްގެ ފަހު މެޗްގައި ސާބިޔާ އާއި ބްރެޒިލް ކުޅުނު މެޗްގައި މާސެލޯ އަށް ވަނީ އަނިޔާވެފައެވެ. ބްރެޒިލްގެ ޓެކްނިކަލް ސަޓާފުންނާއި ހަވާލާދީ ބައިނަލްއަޤްވާމީ ކުޅިވަރު ވެބްސައިޓްތަކުގައި ރިޕޯޓްކޮށްފައިވާ ގޮތުން މާސެލޯ ވަނީ އެންމެ ފަހުން ބްރެޒިލް އިން ބޭވި ފަރިތަކުރުންތަކުގައި ވެސް ބައިވެރިވެފައެވެ.
މާސެލޯ ފަރިތަކުރުންތަކުގައި ބައިވެރިވި ނަމަވެސް އޭނާ ފުރަތަމަ އެގާރައިގައި ނުހިމެނީ ފިޓްނަސް މައްސަލަތަކެއް ކުރިމަތިވެދާނެ ކަމަށް ބެލުމަށް ފަހުގައެވެ.
ބްރެޒިލް އާއި މެކްސިކޯ ކުޅޭ ގަޑީގައި ރަޝިޔާގައި ސަމާރާގެ ފިނިހޫނުމިން 34 ޑިގްރީއަށް އަރާނެތީ އޭގެ ސަބަބުން މާސެލޯ ނޫން އެހެން ކުޅުންތެރިންނަށް ވެސް އުނދަގޫތަކާއި ކުރިމަތިލާން ޖެހޭނެ ކަމަށް ބްރެޒިލްގެ ފިޓްނަސް ކޯޗު ފަބިއޯ ވަނީ ބުނެފައެވެ.
މާސެލޯގެ ބަދަލުގައި ފުރަތަމަ އެގާރައިން ޖާގަ ދޭނީ އެތްލެޓިކޯ މެޑްރިޑަށް ކުޅެމުން އަންނަ ފިލިއްޕޭ ލުއިސް އަށެވެ.