ޓެރަރިޒަމްގެ ކުށް ސާބިތުވާކަމަށް ކަނޑައަޅައި 13 އަހަރުގެ ޖަލު ހުކުމެއް އިއްވާފައިވާ ކުރީގެރައީސް މުހައްމަދު ނަޝީދު މިނިވަންކުރުމުގެ މަސައްކަތް ހުއްޓުމެއް ނެތި ކުރިއަށްގެންދަވާނެ އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމުގައި ވާހަކަދައްކަވަމުން ހަސަން ލަތީފު ވިދާޅުވި ގޮތުގައި ނަޝީދު މިނިވަންކުރުމުގެ މަސައްކަތް އެ ޕާޓީން ހުއްޓާނުލައި ކުރިއަށް ގެންދާނެ ކަމަށެވެ.
އޭގެ ހެއްކެއްގެ ގޮތުގައި ހަސަން ލަތީފު ފާހަގަކުރެއްވީ، ނަޝީދަށް ވާދަކުރެއްވޭ ގޮތް ވެއްޖެ ނަމަ އެމަނިކުފާނު އެމްޑީޕީގެ ކެންޑިޑޭޓްގެ ގޮތުގައި ނެރުމަށް އެމްޑީޕީގެ ކޮންގްރެސްގައި ފާސްކުރި ޤަރާރެވެ.
ހަސަން ލަތީފު އިތުރަށް ވިދާޅުވި ގޮތުގައި އެ ޤަރާރަކީ "މުޅި ޕާޓީ ބޭނުންވާ ގޮތް" ކަމަށާއި ޕާޓީގެ އާއްމު މެމްބަރުން ނިންމާފައިވާ ގޮތަށް، ރައީސް ނަޝީދަށް ޓިކެޓް ހޯދައިދިނުމަށާއި، ރައީސް ނަޝީދު މިނިވަންކުރުމަށް އެމްޑީޕީން ކެނޑިނޭޅި މަސައްކަތް ކުރާނެ ކަމަށެވެ.
"އަޅުގަަނޑުމެން ގަބޫލެއް ނުކުރަން މިނިވަން އިންސާފުވެރި އިންތިހާބެއް ކަމަކަށް ރައީސް ނަޝީދަށް ބައިވެރިނުވެވޭ ގޮތަށް އެ ހިންގާ އިންތިހާބަކީ" ހަސަން ލަތީފު ވިދާޅުވިއެވެ.