ރައީސް އަބްދުﷲ ޔާމީންގެ ސަރުކާރުގެ ބައިވެރިންނަށް އެންމެ ބުއްދިވެރި ގޮތަކީ އަވަހަށް ފޮށިތަންމަތި ބަނދެގެން ފުރަން ތައްޔާރުވުން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ރައީސް ޔާމީންގެ ރަނިން މޭޓެއްގެ ގޮތުގައި 2013ގެ ރިޔާސީ އިންތިޚާބަށް ނިކުންނެވި ޑރ. ޖަމީލު މިހެން ވިދާޅުވީ އިދިކޮޅު ފަރާތްތަކުގެ ކެންޑިޑޭޓެއްގެ ގޮތުގައި ހަމަޖައްސާފައިވާ އިބްރާހިމް މުހައްމަދު ސޯލިޙް (އިބޫ) އަށް މަރުހަބާ ކިޔައި ކުރެއްވި ޓްވީޓްގައެވެ.
ޑރ. ޖަމީލު ވިދާޅުވެފައިވާ ގޮތުގައި ރިޔާސީ އިންތިޚާބު ކޯލިޝަން ކާމިޔާބުކުރާނެ އެވެ. އެހެންވެ ރައީސް ޔާމީންގެ އަރިހުގައި ތިއްބެވި ފަރާތްތަކަށް އެންމެ ބުއްދިވެރި ގޮތަކީ "އަވަހަށް ފޮށިތަންމަތި ބަނދެގެން ފުރަން ތައްޔާރުވުން" ޖަމީލް ވިދާޅުވިއެވެ.
Warm congratulations to @ibusolih for winning the presidential ticket of @MDPSecretariat & representing a united national front for 2018 election. It’d be wise for YAG & aides if they started packing their bags already. pic.twitter.com/0dQXeiNhnm
— Mohamed Jameel Ahmed (@MJameelAhmed) June 30, 2018
ޑރ.ޖަމީލު މިހެން ވިދާޅުވެފައި ވާއިރު ޖުމްހޫރީ ޕާޓީގެ ފަރާތުން އިބޫގެ ރަނިން މޭޓެއްގެ ގޮތުގައި ޑރ.ޖަމީލު ނެރެން އުޅޭ ކަމުގެ އަޑުތަކެއް ވެސް މީގެ ކުރިން ވަނީ ފެތުރިފައެވެ. އެހެން ނަމަވެސް މިހާރު އެންމެ ބޮޑަށް ވާހަކަ ދެކެވެނީ އެ މަގާމަށް ކެންދޫ ދާއިރާގެ މަޖިލިސް މެންބަރު އަލީ ޙުސައިން ގެނައުމަށެވެ.