އައްޑޫ ހިތަދޫ ރީޖަނަލް ހޮސްޕިޓަލް (އެޗްއާރްއާޗް) ހިންގެވުން ހެލްތް މިނިސްޓްރީގެ ސްޓޭޓް މިނިސްޓަރު ޑރ. މުހައްމަދު ހަބީބުއާ ހަވާލުކޮށްފި އެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޑރ. ހަބީބުއާ ހޮސްޕިޓަލްގެ ހިންގުން ހަވާލުކޮށްފައި ވަނީ އިއްޔެ އެވެ.
މިހާރު ހިތަދޫ ހޮސްޕިޓަލް ހިންގުވުމާ ހަވާލުވެ ހުންނެވީ ސީނިއާ ޕަބްލިކް ހެލްތު އޮފިސަރު މުހައްމަދު ނަޖީބެވެ. އެހެން ނަމަވެސް ޑރ. ހަބީބު އާއި މަޝްވަރާކޮށްގެން ހޮސްޕިޓަލުގެ ކަންތައް ކުރިއަށް ގެންދިއުމަށް ހެލްތް މިނިސްޓްރީން ވަނީ ހިތަދޫ ހޮސްޕިޓަލަށް މެމޯ އަކުން އަންގާފައެވެ.
އެކަން ހޮސްޕިޓަލުގެ ސީނިއާ މުވައްޒަފަކު ވަނީ ކަށަވަރު ވެސް ކޮށްދީފަ އެވެ.
ޑރ. ހަބީބުއާ ހިތަދޫ އެޗްއާރްއެޗްގެ ހިންގުން ހަވާލު ކުރި އިރު، އެތަނުން ލިބޭ ޚިދުމަތްތަކާ ދޭތެރޭ ރައްޔިތުންގެ ޝަކުވާތައް ފުނި ޖެހިފައިވެ އެވެ. މީގެ އިތުރުން ވެސް ހޮސްޕިޓަލުގައި މަސައްކަތް ކުރާ މުވައްޒަފުންނާއި އެތަނުގެ މެނޭޖްމަންޓާ ދެމެދު ވެސް ބޮޑެތި ހިތްހަމަނުޖެހުންތައް ހުރި ކަމަށްވެ އެވެ.
ޕީޕީއެމްގެ ފަރާތުން ރިޔާސީ އިންތިހާބަށް އެ ޕާޓީގެ ޓީމުތައް އަތޮޅު ތެރޭގައި ކޭމްޕް ކުރަމުން އަންނަ ޑރ. ހަބީބު ވެސް އައްޑޫގައި ޕީޕީއެމްގެ އެކްޓިވިސްޓުންނާ އެކު އަންނަނީ ހަރަކާތްތެރިވަމުންނެވެ. އެހެންވެ ޑރ. ހަބީބު "ދުވަސްކޮޅަކަށް" އައްޑޫއަށް ބަދަލު ކުރީ ޕީޕީޢެމްގެ ކެމްޕެއިން އަށް ކަމަށް ބެލެވެއެވެ.