ވޯމި އަހަރުގެ ރިޔާސީ އިންތިހާބުގައި ވޯޓް ލުމުގެ ހައްގު ލިބިވައިވާ މީހުންގެ ލިސްޓަށް ހުށަހެޅި ޝަކުވާތައް އިސްލާހުކޮށް އަލުން ނެރުނު ލިސްޓަށް ޝަކުވާ ހުށައެޅުމުގެ ފުރުސަތު އިލެކްޝަންސް ކޮމިޝަނުން (އީސީ) އިން ހުޅުވާލައިފި އެވެ.
އެތަނުން ބުނީ އާ ލިސްޓަށް ޝަކުވާ ހުށައެޅުމުގެ ފުރުސަތު މި މަހުގެ 12 ވަނަދުވަހުގެ ނިޔަލަށް ހުޅުވާލާފައިވާ ކަމަށެވެ. އަދި ލިސްޓަށް ހުށައަޅާ ޝަކުވާތައް އީސީންނާއި ރަށު ކައުންސިލްތަކުން ބަލައިގަންނަމުންދާނެ ކަމަށް ވެސް ބުންޏެވެ.
އިލެކްޝަންސް ކޮމިޝަނުން ކުރިން ޢާންމު ކުރި ލިސްޓަށް ޝަކުވާ ހުށަހެޅުމަށް ދިން މުއްދަތުގައި އެ ލިސްޓަށް 1،700 އަށް ވުރެ ގިނަ ޝަކުވާ ހުށަހެޅި އެވެ.
އަދި އިއްޔެ އަލުން ލިސްޓު އާއްމުކުރީ ކުރީގެ ލިސްޓަށް 1،254 އިޞްލާޙެއް ގެނައުމަށް ފަހު އެވެ. އޭގެތެރޭގައި ކުރީ ލިސްޓްގައި ހިމެނިފައިވާ 18 އަހަރު ނުވާ 734 ކުއްޖެއްގެ ނަން ލިސްޓުން އުނިކޮށްފައިވެ އެވެ.
އީސީން ޢާންމުކޮށްފައިވާ ވޯޓާސް ލިސްޓްގައިވާ ގޮތުން އަންނަ ރިޔާސީ އިންތިޚާބުގައި ވޯޓު ލުމުގެ ހައްޤު 263،000 މީހުންނަށް ލިިބެއެވެ. އޭގެތެރެއިން 24،000 އަށް ވުރެ ގިނަ މީހުންނަކީ އަލަށް ވޯޓްލާ ޒުވާނުންނެވެ.
އިޞްލާޙުތަކާ އެކު އާ ވޯޓާސް ލިސްޓް އާއްމުކޮށްފައިވާ އިރު މި މަހުގެ ތެރޭގައި ރި-ރެޖިސްޓްރޭޝަނަށް ފުރުޞަތު ހުޅުވާލާނެ ކަމަށްވެސް އީސީން ބުންޏެވެ.