ހައްދުފަހަނަޅާފައިވާ ހަނގުރާމަވެރި ޖަމާޢަތް އިސްލާމިކް ސްޓޭޓް (އައިއެސް) ގެ މެންބަރުން ހުއްޓުވުމަށް ޚާއްސަ ސެކިއުރިޓީ ފެންސެއް ޖެހުމުގެ މަސައްކަތް އިރާގުން ފަށައިފިއެވެ.
ބައިނަލްއަޤްވާމީ ނޫސްތަކުން ރިޕޯޓްކޮށްފައިވާ ގޮތުގައި މި ފެންސް ހަދަނީ އިރާގާއި ސީރިއާ ގުޅޭ ބޯޑަރުގައެވެ.
އިރާގުން ގާއިމްކުރާ މި ފެންސްގެ މަސައްކަތް ފެށިތާ ހަފްތާއަކަށް ވުރެ ގިނަ ދުވަސް ވެފައިވާއިރު، އެ ފެންސްގެ އެކި ހިސާބުތަކުގައި ސަވެއިލަންސް ޓަވަރުތަކެއް ވެސް ޤާއިމްކުރާނެއެވެ. އަދި އޭގެ އިތުރަށް ފެންސްގައި ތާމަލް ކެމެރާތަކެއް ހަރުކުރުމަށް ނިންމާފައިވާ ކަމަށް ވެސް އިރާގުގެ އޮފިޝަލުންނާއި ހަވާލާދީ ބީބީސީ އިން ރިޕޯޓްކޮށްފައިވެއެވެ.
އިރާގު ސަރުކާރުގެ އޮފިޝަލުން ބުނާ ގޮތުގައި، ފެންސްގެ މަސައްކަތް ނިމުމުން އިރާގަށް "އެއްވެސް ޓެރަރިސްޓަކަށް އެތެރެއެއް ނުވެވޭނެ" އެވެ.
އައިއެސް ޖަމާއަތުގެ މައްޗަށް އިރާގު ސަރުކާރުގެ ސިފައިން ކާމިޔާބު ހޯދިތާ 6 މަސް ވެފައިވާއިރު އިރާގުގެ އިރުމަތީ ސަރަހައްދުތަކަށް އައިއެސްގެ ހަނގުރާމަވެރިން ދޭތެރެއަކުން އަދިވެސް ހަމަލާދެއެވެ.