ފާއިތުވި ޖޫން މަހުގެ 4 ވަނަ ދުވަހު އިންޑިޔާއިން ގިނަ ޢަދަދެއްގެ މަސްތުވާތަކެއްޗާއި އެކު ހައްޔަރުކުރި ތިން ދިވެހިންނާއި ގުޅުން ހުރި އިތުރު ދިވެއްސަކު އިންޑިޔާގެ ފުލުހުން ހައްޔަރުކޮށްފިއެވެ.
50 މިލިއަން ރުފިޔާގެ އަގުހުރި މަސްތުވާތަކެތީގެ މައްސަލައިގައި އިންޑިޔާގެ ޓްރެވިންޑްރަމުން އެންމެ ފުރަތަމަ ހައްޔަރުކޮށްފައި ވަނީ، ޝަނީޒް މާހިރު (27) އާއި އައިމަން އަހުމަދު (24) އާއި އިބްރާހީމް ފައުޒާން ސާލިހު (29) އެވެ.
އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި މަސްތުވާތަކެތީގެ މައްސަލައިގައި މިފަހަރު ހައްޔަރުކޮށްފައި ވަނީ އަމްހަރު ރަޝީދު ނަމަކަށް ކިޔާ ދިވެހި 22 އަހަރުގެ ފިރިހެނެކެވެ.
އަދި އަމްހަރު ހައްޔަރުކޮށްފައި ވަނީ ރާއްޖެ ދާން އުޅެނިކޮށް ކަމަށާއި އޭނާ އަކީ ކެރެލާ ސްޓޭޓްގައި ހަރަކާތްތެރިވާ މަސްތުވާތަކެތީގެ ޑީލަރުން އަތުން މަސްތުވާތަކެތި ގަންނަ މީހާ ކަމަށް އިންޑިޔާގެ ނޫސްތަކުގައި ވަނީ ރިޕޯޓްކޮށްފައެވެ.
ޓްރެވިންޑްރަމްގެ ފުލުހުން ބުނެފައިވާ ގޮތުގައި އަމްހަރަކީ މީގެ ކުރިން ހައްޔަރުކުރި އައިމަންގެ ރަހަމަތްތެރިއެކެވެ.