ށ. އަތޮޅަށް ރައީސް ޔާމީން މިއަދު ފެއްޓެވި ދަތުރުފުޅުގައި ބިލެތްފަހި އަށް ވަޑައިގެން ވާހަކަފުޅު ދައްކަވަމުން އެމަނިކުފާނު ވިދާޅުވި ގޮތުގައި، ހިންނަވަރު ދާއިރާގެ މެންބަރު އިބްރާހިމް މުހައްމަދު ސޯލިހް (އިބޫ) އަށް ރިޔާސީ ޓިކެޓް ދޭން ނިންމުމުން "އުދާސްތައް ފިލައިގެން ހިނގައްޖެ" ކަމަށެވެ.
ރައީސް ޔާމީން މިގޮތަށް ވިދާޅުވި އެމަނިކުފާނުގެ އިތުރުން ސަރުކާރުގެ ބައެއް ވަޒީރުން ވެސް ވަނީ އިބޫ އަށް މަރުހަބާ ވިދާޅުވެފައެވެ. އަދި އެކަމަކީ ސިޔާސީ ހަމަޖެހުމަށް އެޅުނު ފިޔަވަޅެއް ގޮތުގައި ސަރުކާރުން ދަނީ ބުނަމުންނެވެ.
ރައީސް ޔާމީނާއި ބައެއް ވަޒީރުން އަދި ޕީޕީއެމްގެ މަޖިލިސް މެންބަރުންގެ ވާހަކަފުޅުތަކުން ޕްރެޝަރެއް ނެތްކަން ދައްކަން ކިތަންމެ މަސައްކަތްތަކެއް ކުރެއްވި ނަމަވެސް ހަގީގަތުގައި ފެންނަނީ ސަރުކާރުން "ތެޅިފޮޅެމުންދާ" މަންޒަރެވެ.
އޭގެ ހެއްކެއްގެ ގޮތުގައި، ސަރުކާރުން އިސްވެ މަޝްވަރާއަށް ގޮވާލުމާއި، މިއަދު މަޖިލީހުގެ ޖަލްސާގައި ކަންތައް ވެގެން ދިޔަ ގޮތާއި އަދި ރައީސް ޔާމީން ދައްކަވާ ވާހަކަފުޅުތައް ފުދެެއެވެ.
ރައީސް ޔާމީންގެ ސަރުކާރުން އިދިކޮޅު ފަރާތްތަކާއި އެކު މަޝްވަރާއަށް ގޮވާލަނީ އަބަދުވެސް ސަރުކާރަށް އެތެރެ އާއި ބޭރުގެ ޕްރެޝަރ ކުރިމަތިވާ ދަނޑިވަޅުތަކުގައެވެ. މިފަހަރު ވެސް ސަރުކާރުން މަޝްވަރާއަށް މި ގޮވާލީ އިދިކޮޅުން އެއް ކެންޑިޑޭޓެއް ނެރެން އެއްބަސްވެފައި ވަނިކޮށެވެ. އިދިކޮޅުން އެއް ކެންޑިޑޭޓެއް ނެރެފިނަމަ ރިޔާސީ އިންތިޚާބުގައި ރައީސް ޔާމީނަށް ވަރަށް ބޮޑު ގޮންޖެހުމަކަށް ވާނެއެވެ.
ރައްޔިތުންގެ މަޖިލީހުގެ ޖަލްސާގައި މިއަދު ބިލަކަށް ވޯޓަށް އަހަން ބޭނުންވާ އަދަދަށް ތަޅުމުގައި މެމްބަރުން ނެތް ކަމަށް ވިދާޅުވެ، ވޯޓަށް އެހުމަށް ރައްޔިތުންގެ މަޖިލީހުގެ ރައީސް އަބްދުﷲ މަސީހް ދެކޮޅު ހެއްދެވުމުގެ ފަހަތުގައި ވަނީ ވެސް ސިޔާސީ ގޮތުން ސަރުކާރުން ދޫދޭން އުޅޭކަން ދެއްކުން ކަމަށް ބެލެވެއެވެ.
މަޖިލީހުން މިއަދު ވޯޓަށް ނޭހި ތިން ބިލުގެ ތެރޭގައި ރައީސް ނަޝީދާއި ގާސިމަށް ރިޔާސީ އިންތިހާބަށް ކުރިމަތި ނުލެވޭ ގޮތަށް ހުށަހެޅި އިސްލާހުތައް ހިމެނެއެވެ.
މީގެ އިތުރުން ޕީޕީއެމްގެ ކެމްޕެއިން ޓީމުތައް އަތޮޅު ތެރޭގައި ކޭމްޕް ކުރަން ފަށާފައި ވާއިރު ސިޔާސީ މަގާމުތަކުގައި ތިއްބެވި ބައެއް ބޭފުޅުން ވެސް ރަށްތަކުގައި މަސައްކަތް ކުރަން ވަނީ ފަށާފައެވެ.
މި ހުރިހާ ކަމަކާއި އެކު ވެސް އެނގި ކަށަވަރުވާ ކަމަކީ ޕީޕީއެމް އިން ތެޅިފޮޅެން ފަށައިފި ކަމެވެ. ޕީޕީއެމްގެ ތެރޭގައި އުދާސްތަކެއް ނެތި އެޕާޓީގެ މަޖިލިސް މެންބަރުން މާޔޫސް ކަންމަތީގައި ތިބެ ނޫސް ކޮންފަރެންސްތަކެއް ނުބާއްވާނެ ކަމެވެ.
މި ހުރިހާ ކަމެއް ފެންނަން ފެށީ އިބޫ އަކީ އިދިކޮޅު ކެންޑިޑޭޓް ކަމަށް ކަނޑައެޅި ހިސާބުންނެވެ. އިދިކޮޅު ފަރާތްތަކުން ބުނަމުން އައި "އެއް ކެންޑިޑޭޓް" ގާތްގަނޑަކަށް ފައިނަލް ވެފައިވާ ކަމުގެ މަންޒަރު ފެންނަން ފެށި ހިސާބުންނެވެ.
ރައީސް ޔާމީން ވިދާޅުވި ނަމަވެސް ސަރުކާރު ފަޅިން ފެންނަނީ އުދާސްތައް އިތުރުވެފައިވާ މަންޒަރެވެ. އަވަސް ފިޔަވަޅުތަކެއް އަޅަން "ތެޅިފޮޅެމުންދާ" މަންޒަރެވެ.