އައްޑޫގައި އައިޓީ ޕާކެއް ޤާއިމްކޮށްދެއްވާނެ ކަމަށް ވިދާޅުވިތާ، 1700 ދުވަސް ފަހުން ރައީސް އަބްދުﷲ ޔާމީން އަނެއްކާ ވެސް އައިޓީ ޕާކެއްގެ ވާހަކަ ވިދާޅުވެއްޖެއެވެ.
ރައީސް ޔާމީން އައްޑޫގައި އައިޓީ ޕާކެއް ޤާއިމްކުރާނެ ކަމަށް ވިދާޅުވީ، 2013 ވަނަ އަހަރުގެ ނޮވެމްބަރު މަހުގެ 5 ވަނަ ދުވަހުއެވެ. އޭގެ ފަހުން އެމަނިކުފާނު އެއްވެސް ވާހަކަފުޅެއްގައި "އައިޓީޕާކް"ގެ ނަން ވެސް ވިދާޅެއް ނުވެއެވެ. މިފަހަރު ވެސް ރައީސް ޔާމީން ވިދާޅުވީ، އައްޑޫގައި އައިޓީ ޕާކް ޤާޢިމްކުރައްވާ ވާހަކައެއް ނޫނެވެ.
ށ.ކަނޑިތީމަށް ވަޑައިގެން އެ ރަށުގެ ބަނދަރު ހުޅުވުމުގެ ރަސްމިއްޔާތު ޝަރަފުވެރި ކުރައްވައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ސަރުކާރުން ކުރިއަށް ގެންދާ މަޝްރޫއުތަކުގެ ތެރެއިން ދެން ވިސްނުން އޮތީ މި ސަރަހައްދުގެ އެހެން ގައުމުތަކުގައި ހުރި ވަރުގެ އައިޓީ ޕާކެއް ރާއްޖޭގައި ވެސް ގާއިމް ކުރަން ކަމަށެވެ.
އެހެން ނަމަވެސް އެ އައިޓީ ޕާކު ޤާއިމް ކުރާނެ ގޮތަކާއި ބެހޭ އެއްވެސް ތަފްސީލެއް ރައީސް ޔާމީން ނުދެއްވައެވެ.
2013 ވަނަ އަހަރު ޕީޕީޢެމްގެ ރިޔާސީ ކެންޑިޑޭޓްގެ ގޮތުގައި ހުންނަވައި ރައީސް ޔާމީން އައްޑޫގައި އައިޓީ ޕާކެއް ޤާއިމްކުރައްވާނެ ކަމަށް ވިދާޅުވި ނަމަވެސް އެފަހަރު ވެސް އޭގެ މާބޮޑު ތަފްސީލެއް ނުދެއްވައެވެ. އަދި ފާއިތުވި 1700 ދުވަހު ތެރޭގައި އެކަމާއި ބެހޭ އެއްވެސް ވާހަކައެއް ސަރުކާރުގެ އެއްވެސް ވުޒާރާ އަކުން ހާމައެއް ނުކުރެއެވެ.